Rekruta Traballador Ba Servisu, Timor Oan Presiza Hatene Lian Japaun
SAPNewsTL, Dili: Sekretáriu Estadu Formasaun Profisionál no Empregu (SEFOPE) hala’o enkontru hó Prezidente Kompaña CWP Global Kon Yosuke hó ekipa husi Japaun, objetivu husi sorumutu ne’e parte rua deskute oinsá bele fó formasaun no rekruta joven Timor oan ba servisu iha Japaun.
Tuir Direktor Jeral SEFOPE Paulo Alves katak realiza enkontru ida ne’e ho prezidente kompanha CWP Global atu ko’alia kona-ba formasaun ba Sistema operasaun, bee mos no IT nian.
“Ita halo enkontru hó Prezidente Kompaña CWP Global Kon Yosuke hó ekipa husi Japaun tanbá sira iha polítika atu fó formasaun ba sistema operasaun bee mos no IT nian, hodi nune’e sira bele rekruta joven Timor oan ba hala’o servisu”.Dehan Direktor Jeral SEFOPE Paulo Alves ba jornalista iha salaun SEFOPE Caicoli, Kuarta-Feira, 21/09/2022.
Direktor ne’e mos hatutan tan, kona-ba formasaun bee mos ne’e kompanhia informa ona katak sei presiza enjineriu Timor oan ne’ebé iha esperiensia bee no IT atu ba servisu iha área Sistema bee no IT maibe sira nia kriteira tenke hatene lian Japaun tanba ne’e molok ba tenke tuir uluk formasaun lian Japaun nian.
Iha fatin hanesan, Prezidente Kompanhia CWP Global Kon Yosuke hateten iha enkontru ho SEFOPE ho nia Direktor Jeral sira ne’e oinsa atu kapasita Timor oan sira iha área bee mos no IT
“Ami halo enkontru ne’e atu fo formasaun, oinsa kapasita Timor oan sira hodi halo dezenvolvimentu iha iha Timor Leste no iha Japaun”. Tenik Prezidente Kompanhia.
Prezidente Kompanhia ne’e mos husu ba governu Timor Leste liu husi Sekretária Estadu Formasaun Profisionál no Empregu atu bele koopera hó governu Japaun hodi bele fó formasaun ba joven Timor oan sira no oinsá atu haruka joven ba servisu iha Japaun
Entretantu nia fundamenta, iha ona orientasaun ba ekipa tékniku husi SEFOPE nó mós Governu Japaun nian atu bele halo diskusaun kona-ba memorandum Entendimentu entre Governu Timor Leste hó Japaun, nune’e bele fasilita Timor oan ba servisu iha Japaun hó baze legál.
Enkuantu,prezidente kompanhia ne’e mos seida’uk bele fo sai kona-ba joven Timor oan nain hira mak atu partisipa iha formasaun ne’e no servisu iha Japaun.
Jornalista : Antonio Tilman & Aquelina Taec
Editor : Ekipa Editorial