Respeita Regra Trânzitu ! Amaro : Ta’uk Polísia Ne’e Sala, Salva Vida Ne’e Importante

Imajem : Segundu Komandante PNTL no Xefe Trânzitu Eskuadra Luro Superintendente Xefe Amaro da Costa Dias iha Luro, 11/06/2024

SAPNewsTL, Lautem – Polisia Nasional Timor Leste liu husi Seksaun Trânzitu Eskuadra Postu Luro Munisipiu Lautem hala’o pasa revista ba transporte públiku no privadu husi fulan Janeiru to’o fulan Juñu hetan koima hamutuk dolar atus tolu sianulu resin tolu (393) ne’ebe hatama ba iha banku.

Iha intrevista ho Segundu Komandante PNTL no Xefe Trânzitu Eskuadra Luro Superintendente Xefe Amaro da Costa Dias haktuir pasa revista ne’ebe sira halo bazeia ba lei kodigu estrada ho objektivu atu hanorin komunidade sira hodi kumpri regra tranzitu no lori dokumentus wainhira konduz motor no karreta.

“Ami implementa lei kodigu Estrada Nu. 6/2003 kona-ba regra konduz karreta ka motor liu-liu ema ne’ebe ke lori motor ka karreta tenke iha karta kondusaun nomos lori motor tenke uza kapasete ne’e lei mak haruka nebe ami implementa ida ne’e, objetivu laos dehan ami odiu komunidade sira liu-liu ba motorista ka kondutores sira atu hasai osan maibe hanesan sentidu importante liu mak ita hanorin sira para uza kapasete, ne’e intensaun mak karik hetan asidente ruma bele salva ita nia vida”. Hato’o husi Segundu Komandante PNTL no Xefe Trânzitu Eskuadra Luro Superintendente Xefe Amaro da Costa Dias iha nia kna’ar fatin hafoin remata pasa revista iha Eskuadra Luro, 11/06/2024

Segundu Komandante ne’e informa wainhira sira halo infrasaun sira ba selu iha banku Lospalos hafoin sira aprezenta resibu husi banku maka foti sira nia transporte.

“Infrasaun ne’ebe ami halo ne’e sira ba multa iha banku BNCTL iha ne’ebe hahú Janeiru to’o Juñu tinan 2024 ida ne’e hetan ona koima dolar atus tolu sianulu resin tolu (393) ba banku, ami prense formatu depois sira ba foti formatu orijinal husi trânzitu Munisipiu sira ba banku selu tiha depois lori resibu banku nian mai aprezenta mak ami bele entrega motor ho dokumentus, durante ami halo infrasaun sira nia dokumentus no motor ami tahan intensaun atu sira ba selu koima tiha mak mai foti”. Katak Xefe Trânzitu

Xefe Trânzitu Eskuadra Luro ne’e hateten wainhira halo passa revista sei hapara hotu transporte sira ne’ebe sirkula hodi haree sira nia dokumentus ba karreta no motor inklui karta kondusaun ba motorista sira.

“Kuandu check point atu iha dokumentus ka la iha dokumentus uza kapasete ka la uza kapasete kualker transporte ne’ebe sirkula hotu-hotu tenke hapara atu haree ema ne’ebe lori motor nia karta kondusaun no hatene transporte ne’ebe lori ne’e iha dokumentus ka lae, iha Luro fo infrasaun ba sira ne’ebe balun lori motor maibe sem karta kondusaun ne’ebe dala barak ami fo infrasaun ba sira ne’ebe mak la uza kapasete”.

“Liu husi edukasau sivika ita fo hatene hahu tinan 2013 maibe ita nia komunidade sira balun nafatin kontras regras sira ne’e, entaun ita tenke fo infasaun ba sira sentidu katak sira tenke ba delu koima para sira hatene”. Polisia Amaro

Imajem : Entrevista Segundu Komandante PNTL no Xefe Trânzitu Eskuadra Luro Superintendente Xefe Amaro da Costa Dias

Polisia Tranzitu Amaro dehan, antes ne’e sira halo ona kontrolu trafiku hodi bolu atensaun ba motorista sira hodi sira bele tuir regra tranzitu ne’ebe iha liliu ba motor sira tenke uza kapasete.

“Primeiru ita halo kontrolu trafiku ho intensaun atu fo hatene ba motorista no kondutor sira ne’ebe lori karreta ho motor la tuir regra karik ita fo atensaun ba sira, nune’e mos halo deklarasaun para loron seluk sira la bele halo tan, kontrola ba ema ne’ebe lori motor no karreta la tuir regra por exemplo lori motor la uza kapasete ita hapara, wainhira sira la iha karta kondusaun maibe lori motar uza kapasete tantu mesak no tula malu uza kapasete ita labele hapara tamba ita la halo checkpoint ita kontrolu trafiku de’it”. Amaro salienta

Amaro mos husu ba motorista sira atu lori dokumentus ba transporte ne’ebe konduz no halo karta kondusaun ba sira ne’ebe seidauk iha atu labele impede sira nia movimentu wainhira tama passa revista.

“Apelu ba komunidade sira liu liu ba kondutores no motorista ne’ebe sirkula transporte iha postu Luro husu para lori motor karik uza kapasete karik seidauk karta kondusaun trata karta kondusaun para imi kuandu ba fatin ruma lori karreta motor bele livre se kuandu la uza kapasete ou la iha karta kondusaun ita kuandu tama checkpoit bele impede imi nia viajem, imi bele hetan infrasaun bele hasai osan ba selu iha banku, lori motor tenke iha karta kondusaun tenke uza kapasete tantu mesak ka tula malu hotu hotu taka kapasete nia intensaun karik hetan asidente salva ita nia vida ne’e importante, labele tamba tauk polisia ne’e sala”.Nia hameno

Entretantu, Nia haklean durante ne’e sira halo pasa revista iha deit eskuadra nia oin tanba rekursu la sufisiente maibe tuir planu sira sei kontinua halo iha area Postu Luro iha fatin ne’ebe movimentasaun barak

“Halo checkpoint ne’e hare ba ami nia perdonil, tuir planu halo iha Posto Luro iha kualker fatin maibe agora dadauk ami sei halo de’it iha eskuadra nia oin tamba personil menus, ba futuru ami sei halo fatin ne’ebe movimentu barak”. Nia hakotu

Jornalista: Evarinda Pinto