Sabino Ho Idade 65, Sofre Defisiente Matan ! Maibe MSSI Finji La Rona Nia Halerik

SAPNewsTL, Lautem – Sidadaun Sabino Bernadino ho kondisaun defisiensia matan, iha Suku Lore 1 Postu Administrativu Lore Munisípiu Lautem ho idade 65,  seidauk hetan apoiu husi Governu hodi asesu ba atendimentu kuidadu saúde

Defisiente Matan Sabino Bernadino hateten, desde 2020 ate agora nia parte senti tristi tebe-tebes, tamba la hare ona hanesan uluk, hodi buka osan sustenta nesesidade familia, no asesu ba fasilidade saúde sira tamba Governu seidauk halo konstrusaun ne’ebe asesivel ba nia hodi asesu.

“Tinan barak ona, ha’u senti tristi tebe-tebes tanba labele haree hanesan maluk sira seluk, ha’u dependente deit ba ha’u nia fen kaben mak buka osan hodi sustenta ami nia familia, autoridade lokal halo ona pedidu ba Governu maibé ha’u seidauk hetan apoiu ruma” Dehan Sabino Bernadino ba Jornalista sira iha nia residénsia, Horolata Qinta(31/05/2024)

Tuir kronolojia ne’ebe Média SAPNews Timor-Leste asesu direita husi deklarasaun defisiente Sabino Bernadino, haktuir, iha tinan 2020 nia kondisaun normal hanesan sidadaun sira seluk, maibé derepenti deit nia hetan doensa afetadu ba nia matan sai mean hodi rezulta nia matan la hare hanesan uluk.

“Ha’u nia matan ne’e bainhira hetan moras iha 2020, iha istoria kona ba matan ne’e foufoun mosu sintomas rezulta matan sai mean hafoin derepenti deit sintomas refere hahu dezenvolve aan kauza ha’u nia matan la hare hanesan babain. Bainhira hau tur mesak hanoin ba oan sira,  ha’u nia esperansa lakon halo ha’u deskontenti iha ha’u nia viajen moris, tanba ha’u labele hare ona” Tenik nia.

Nia afirma, hanesan ema ho kondisaun difisiensia matan nafatin pasensia, tamba problema matan nia ba halo ona tratamentu iha Hospital Nasionál Guido Valadare (HNGV sigla Portugués) maibé nia parte hetan resposta husi, Doutor sira katak problema matan ne’ebe nia enfreta susar atu halo tratamentu médiku.

“Bainhira ha’u ba haris fatin soe bee,  ha’u nia oan sira prepara besi  ida sai nu’udar simbolu atu hau bele rona hodi la’o tuir, tamba hau nia fen kaben tenki ba serbisu halo to’os, ha’u nia oan sira ba eskola, entaun sinais husi besi ne’ebe sira prepara sai hanesan fonte ba ha’u atu hakat ba haris fatin”. Nia dehan

Iha sorin seluk,  Xefe Suku Lore 1 Abilio Amaral klarifika, Postu Administrativu Lore Munisipiu Lautem rejistu numeru ema ho kondisaun defisiente, Matan, Tilun no Fisiku hamutuk ema nain 43, maibé difisiente balun hetan ona apoiu husi Governu no balun seidauk hetan apoiu.

“Ami hanesan autoridade lokal kopera ho familia defisiente sira, oinsa hanoin hamutuk buka mekanismu hodi trata maluk difisiente sira nia dokumentus, maibé kaborasaun ne’ebe ami halo familia desifiente ladun kopera diak ho ami, familia laiha interese diak atu tulun maluk defisiente sira asesu ba karta estadu mediku”. Xefe Suku Lore 1 informa

Xefi Suku Salienta, nia parte hato’o ona informasaun ba familia defisiente sira atu bele tulun maluk defisiente asessu ba dokumentus sira, nune’e Governu liu husi Ministeriu Solidadriedade Sosial no Inkluzaun, identifika tuir dadus ne’ebe iha, hodi fó apoiu ba maluk defisiente sira iha Postu Administrativu Lore Munisípiu Lautem liu-liu maluk difisiente matan.

“Durante ne’e ami observa direita katak defisiente Sabino Bernadino, iha fatin deit nia labele halo atividade, entaun nia fen kaben obrigadu tenki serbisu maka’as liu halo tos no fa’an produtu lokal hanesan nu hodi sustenta sira nia familia inklui selu oan nia sira nia eskola”.

“Tan ne’e, ami mos halo pedidu barak  ba ita nia sentro servisu solidariedade  sosial Munisipiu Lautem  atu bele apoiu maluk defisiente sira maibé husi parte, Munisipiu responde tuir tempu, dalaruma sira apoiu de’it fos saku ida ka rua mai iha suku”.

Lideransa suku ne’e afirma iha tinan kotuk Governu liu husi, Sentru Solidadriedade Sosial Munisípiu Lautem fó  ona apoiu ba familia vunerabel balun, maibé apoiu refere la kobre hotu ba maluk defisiente 43 iha postu  Administrativu Lore, tamba maluk defisiente barak mak sei falha iha dokumentus sira.

Autoridade suku Lore 1 iha planu atu relata problema ne’ebe maluk defisiente sira hasoru ba parte relevante, maibé Governante sira la tau iha prioridade, oinsa atu bele tulun maluk defisiente sira ou maluk vuneravel sira liuhusi defisiente matan sira ne’ebe la asesu ba buat hotu.

Xefi Suku Abilio, aprofunda iha tinan 2022 suku Lore1 nia ema defisiente nain rua (2), hetan apoiu husi Governu asesu ba iha Programa  Nasionál Dezenvolvimentu Suku (PNDS) entaun maluk nain rua ne’e hetan ona, uma naroman ba povu (UKL), Defisiensia seluk seidauk hetan apoiu tanba sira sei bele halo aktividades no bele kaer servisu hodi bele sustenta nesesidade uma laran nian.

Enkuantu Xefi Aldeia Horolata, Edmundo Fereira  Xiqeira reforsa relasiona ho defisiensia matan nia kondisaun ne’e, Xefi aldeia trata ona ninia dokumentu iha sentru saúde, hafoin parte saúde submete dokumentos refere ba hospital munisipal, maibé mediku sira resposta katak problema matan ne’ebe sidadaun, Sabino Bernadino enfrenta, ho grau moras karatas entaun seidauk bele hetan subsidiu defisiensia nian.

“Durante ne’e maluk defisiente refere la iha apoiu ruma husi parte governu, tanba ne’e nu’udar xefe aldeia esforsu hela, atu nune’e nia bele hetan apoiu husi Governu, ami buka dalan oinsá defisiensia matan ne’e bele hetan apoiu husi Ministeriu solidadriedade sosial no inkluzaun, tanba defisiensia sira balun hetan ona apoiu husi Governu”.nia deklara

Hafoin, notisia ne’e publika SAPNewsTL seidauk halo komfirmasaun parte Ministériu Solidariedade Sosial no Inkluzaun tanba sei okupadu ho servisu seluk.

Entertantu, Média SAPNews Timor-Leste rekoilha informasaun husi Postu Administrativu Lore Munisípiu Lautem, kona-ba maluk difisiente sira tamba Associação Jornalista Timor-Leste (AJTL) serbisu hamutuk ho Oxfam iha Timor Leste realiza atividade, Média Tour ne’ebe finansia husi Oxfam iha Hongkong

Jornalista : Ermelinda Soares