Sarani Hamutuk 164.777 Rejistradu Partisipa Misa Tasi-Tolu, La Rejistu Mós Bele Tuir

Imajem : Sekretaria Estadu Komunikasaun Sosial (SEKOMS) Espedito Dias Ximenes & Responsavel Ekipa Forsa Tarefa Konjunta Superitendente Koronel Dobu iha Nunsiatura Apostólika Motael Dili, 03/09/2024. Foto : Ermelinda Soares

SAPNewsTL, Dili – Relasiona ho vizita Sua Santidade Papa Francisco iha loron 09-11 Fulan Setembru, Sekretaria Estadu Komunikasaun Sosial (SEKOMS) Espedito Dias Ximenes haktuir sarani husi 14 Munisipíu Inklui RAEOA ne’ebe registradu partisipa misa Tasi-Tolu hamutuk 164.777.

Sekretaria Estadu Komunikasaun Sosial Espedito Dias Ximenes informa to’o ohin loron komisaun registu ona peregrinu hamutuk rihun atus ida neenulu resin-haat, atus hitu hitunulu resin-hitu (164.777) husi munisípiu sanulu resin-haat (14).

“Peregrinu ne’ebe registu ona hamutuk 164.777, kompostu hosi Munisípiu Lautém hamutuk 5.503, Baukau hamutuk 13.702, Viqueque hamutuk 6.530, Manufahi hamutuk 3.850, Aileu hamutuk 7.500, Bobonaru hamutuk 7.805, Ermera hamutuk 14.330, Manatutu hamutuk 7.841, Likisa hamutuk 12.400, Ainaru hamutuk 9.322, Covalima hamutuk 4.356, Dili hamutuk 67.994, Atauro hamutuk 1.300 no Rejiaun Administrativa Espesial Oe-Cusse Ambeno (RAEOA) hamutuk 2.344”. Tenik Sekretaria Estadu Komunikasaun Sosial Espedito Dias Ximenes ba Jornalista sira iha Nunsiatura Apostólika Motael Dili,03/09/2024

Sekretariu Estadu ne’e hatutan, total rejistradu misa Tasi-Tolu ne’e seidauk konta ho sira ne’ebe hahú rejistu iha loron 1-3 Fulan Setembru inklui peregrinu hirak ne’ebe mai hosi rai-liur.

Peregrinu husi parte leste sei halo akampamentu iha area Acanuno Hera, Husi Rai-Klaran sei destina iha area Kasnafar, no husi parte Oeste sei hela iha Area Tibar, fatin hirak ne’e preparadu ona ba peregrinu sira.

Ligadu ho sarani ne’ebe la halo registrasaun, Espedito Dias Ximenes deklara sarani ne’ebe la registu bele ba partisipa, importante la lori sasan kroat no kumpri regra ne’ebe iha.

“Sira ne’ebe la rejistu bele ba partisipa misa iha Tasi-Tolu, sira nia fatin prepara ketak, sira hamrik iha estrada sorin, besik tasi-ibun”. Nia dehan.

Liga ba parte seguransa, Responsavel Ekipa Forsa Tarefa Konjunta Superitendente Koronel Dobu haktuir sira nia parte prepara antes no preparadu hodi destaka ba akampamentu peregrinu sira no asegura seguransa ba vizita Sua Santidade Papa Francisco nian iha Timor-Leste.

“Ami prepara antes ona, ami sei asegura situasaun hotu kona ba vizita Santu Padre Papa Francisco nian, Seguransa ne’e kompostu husi F-FDTL, PNTL, inklui grupu kategoriais Igreza Katólika nian hanesan THS-THM, Eskuteirus, Soldadu Ba Kristu por volta de rihun tolu (3.000)”. Hateten Superitendente Koronel Dobu

Informa fali katak, sarani sira iha kapital Dili kontinua halo rejistrasaun no simu kamizola ne’ebe sei uza hodi partisipa iha misa Tasi-Tolu ne’ebe prezide hosi Sua Santidade Papa Francisco.

Tuir informasaun ne’ebe SAPNews asesu iha Parokia Maria Auxiliadora Comoro, Parokia Santo António Motael no Parokia São José Ai-Mutin katak to’o ohin loron sarani sira kontinua forma no halo rejistrasaun hodi simu kamizola Santu Padre Francisco nian.

Nune’e sarani sira ne’ebe seidauk rejistu bele hakat ba Parokia ne’ebe besik hodi halo rejistrasaun no simu kamizola ne’ebe Governu prepara no uza ba partisipa misa iha Tasi-Tolu tanba rejistasaun sei to’o iha loron kinta-feira semana ne’e.

Tuir observasaun SAP News TL iha terenu nota katak fatin públiku sira iha kapitál Dili hahú dada Bandeira Timor-Leste no Vatikanu, pinta ona moru públiku sira ho kor oioin, monta ona imagem no Banner Santu Padre Papa Francisco nian iha dalan públiku, ekipa bombeirus mós fase ona estrada públiku iha Rotunda Nicolau Lobato ba Tasi-Tolu.

Enkuantu, Sua Santidade Papa Francisco to’o ona iha Indonésia hodi halo vizita pastoral durante loron 3 hahú husi loron 03-06 Fulan Setembru.

Hafoin Papa Francisco kontinua nia vizita ba Papua Nova Guine hahu hosi loron 06-09 Setembru, remata vizita iha Papua New Guine, Santu Padre sei kontinua mai Timor-Leste iha loron 09-11 Setembru.

Ikus liu, Papa Francisco sei konklui nia vizita iha azia pasífiku iha Singapura husi loron 11-13 Fulan setembru hafoin fila fali ba Vatikanu.

Fo hanoin fali katak fatin neen ne’ebe Sua Santidade Papa Francisco sei halo vizita iha Timor-Leste maka Nunsiatura Motael, Palásiu Prezidensial Nicolau Lobato, Orfanatu Madre Alma iha Pantai-Kelapa, Igreza Catedral Metropolita de Dili, Tasi-Tolu, no Centro Concenções de Dili (CCD), hafoin sei fila fali ba Roma.

Jornalista : Ermelinda Soares