Despede Traballador 62 ! SEFOPE Seida’uk Iha Data Fixu Ba Koresaun Teste Vaga Online

SAPNews TL, Díli – Governu Timor-Leste (TL) liu husi Sekretário Estadu Formasaun Profisiónal no Empregu (SEFOPE sigla Portugués) hala’o tan serimonia despedida ba trabalhador Timoroan hamutuk 62 ne’ebe sei koloka ba serbisu iha nasaun Australia.

Diretor Nasionál Empregu Exterior, Sekretáriu Estadu Formasaun Profisional no Emprego, João Correira Periera hateten, SEFOPE liu husi Diresaun Nasional Empregu Estrangeiru, kontinua despede trabalhador Timoroan feto no mane sira ne’ebe pasa ona teste atu ba hala’o serbisu iha Australia tuir kontratu ne’ebe Governu Timor-Leste akordu ho Governu Australia.

“Trabalhador sira ne’ebe atu ba servisu iha Australia hamutuk ema nain 62, ohin ita husik sira atu ba serbisu iha Australia, maioria trabalhador sira feto 12 no mane 50, entre sira na’in 58 re-entry no na’in 4 mak foun.” Informa Diretor Nasionál Empregu Exterior João Correia Pereira ba Jornalista sira iha salaun Kaikoli (01/06/2024).

Nia salienta, Governu apresia ho esforsu ne’ebe Timoroan sira halo, tamba ne’e parte Sekretário Estadu Formasaun Profisiónal no Empregu husu ba trabalhador sira atu serbisu tuir komprimisiu ne’ebe sira hala’o ona ho Governu, importante trabalhador sira labele halai ses husi sistema.

“Governu fasilita deit tuir termu legal ne’ebe iha maibé trabalhador sira tenki mantein serbisu bazeia ba regras ne’ebe sira rasik ohin lee hodi halo komprimisiu ida entre sira ho Governu no empregador husi Australia, bainhira ba serbisu iha ema nia rai la bele koko atu ses husi sistema atu nune labele bele prejudika ba ita nia maluk sira ne’ebe agora hein hela, tuir processu teste”. Nia husu

Diretor João Correira Pereira salienta, trabalhador 62 ne’e maioria ba serbisu iha area agrikuktura, ho nune’e kontratu ba tempu badak fulan nen (6) to’o fulan sia (9).

Aleinde ne’e, João Correira Pereira informa mos kona ba prosesu teste online no eskrita ne’ebe kobre ona Munisipiu 13 inklui Região Administrativa Espesiál Oe-cusse Ambenu (RAEOA) sei iha progresu koresaun ba materia sira ne’ebe trabalhador sira prense, hafoin ekipa Sekretário Estadu Formasaun Profisiónal no Empregu sei anunsia ba públiku iha tempu badak.

“Teste online ne’ebe SEFOPE halo hotu ona husi Munisipiu hotu-hotu, agora ami sei forma ekipa ida atu halo koresaun ba materia eskrita ne’ebe agora iha ami nia fatin depois halo koresaun mak ita fó sai ba Munisipiu hotu-hotu, se mak pasa iha prosedur teste eskrita, tamba ema ne’ebe pasa mak bele liu ba processo entrevista depois entrevista hotu, se mak pasa tama iha sistema, prontu atu serbisu tuir empregador sira husu mak ita bele koloka ba”. Nia informa

Nia informa SEFOPE seidauk iha data fiksu ba koresaun materia maibé tempu badak ekipa ida sei hala’o koresaun bazeia ba desizaun ne’ebe iha, hafoin Diresaun Nasionál Empregu Eatrangeiru sei anunsia ba publiku, tamba nasaun hanesan Coreia, Japaun no Singapura mos presija trabalhador Timoroan sira atu ba serbisu.

“Maluk Timoroan sira ne’ebe pasa iha teste eskrita no intervista ita agradese, maibé maluk balun ne’ebe la pasa SEFOPE kontinua fó oportunidade ba sira ne’ebe interese atu bele tuir formasaun iha Munisipiu, atu bele hetan sertifikadu aban bainrua ita sei iha processu ida ema ne’ebe iha sertifikadu formasaun sei la teste eskrita maibé entrevista importante mak ema ne’e hatudu nia sertifikadu ingles, entaun ema ne’ebe iha koinsementu sei la tuir eskrita”. João deklara

Entertantu, Sekretário Estadu Formasaun Profisiónal no Empregu liu husi Diresaun Nasional Empregu Estrangeiru sei fasilita Formasaun lian iglhes ba Joventude sira iha Munisipiu 13 iklui Região Administrativa Espesiál Oe-cusse Ambenu, tuir planeamentu no prepasaun ne’ebe SEFOPE hala’o ona.

Jornalista : Eleonora Fátima Sarmento