Seidauk Tempu Funsionáriu Institutu No Empreza Públiku Sira Hetan Saláriu Boot
SAPNewsTL, Dili : Relasiona ho lista salarial ba funsionáriu sira iha Institutu Públiku no Empreza Públiku sira ne’ebe viral iha media Sosial, Deputadu Vise Prezidente Bankada CNRT Patrocino Fernandes hateten salário Prezidente, Direitor ne’e aas tanba mai ho base legal hanesan dekretu lei sira ne’ebe fo dalan
“Ne’e la’os sira nia kulpa maibe sira simu salario ne’e ho base legal, hanesan Timor oan preokupa mos situasaun ne’ebe ita nia ekonomia no ita nia fontes finanseiru mos ida deit, Institutu Públiku no Empreza Públiku bele integra iha ministeriu sira para halo serbisu, transforma lais ba instituisaun públiku no Empreza Públiku sira ne’ebe bele goja sira nia institutu rasik mai ho dekretu sira fo sira nia regalia ne’ebe boot tebes, servi povu ita haree laiha mudansa no balansu entre buat ne’ebe sira simu ho buat ne’ebe sira presta”.Dehan Deputadu Patrosiniu ba Jornalista sira Bankada CNRT Tersa 13/09/2022.
Deputadu ne’e kestiona sensibilidade guvernu nian ba realidade povu Timor ne’ebe enfrenta krize polítika hodi perturba prosesu desenvolvimentu nasaun nian
“Governo maka bele esplika didiak liu kona-ba polítika hamosu dekretu lei sira ne’e maibe dekretu lei sira ne’e refleta lolos governante sira nia laiha sensibilidade ba moris realidade povo Timor nian, ita bele dehan moral ne’e menus uitoan tanba iha situasaun no tempu ne’ebe ita hasoru krize politika hodi perturba tiha prosesu dezenvolvimento paradu, Au mesmo tempu ita hamosu dekretu lei sira ne’ebe bele fo regalias ba grupu oan ida ho salário ne’ebe boot teb-tebes”. Nia Sublinha
Enkuantu, Deputadu ne’e akresenta Seidauk to’o tempu ba Instituisaun Públiko no Empreza Públiku sira goja saláriu boot hanesan ne’e tanba instituisaun Públiku no Empreza públiku sira ne’e seidauk bele hatama sira nia reseita rasik ne’ebe ke bele asegura katak sira nia saláriu sira ne’e selu deit ho reseita ne’ebe sira hatama
Jornalista : Ermelinda Soares