TL Sei Partisipa Simeira Mundial Iha ONU, Xanana Sei Hasoru Malu Ho Joe Biden
SAPNewsTL, Dili: Prezidente Repúblika José Ramos Horta delega Líder Nasionál Kay Rala Xanana Gusmão hodi reprezenta estadu Timor Leste bá Simeira Internasionál kona-ba Edukasaun ne’ebé sei hala’o iha ONU iha loron 19 fulan Setembru tinan ne’e.
“Maun Bo’ot Xanana bá simeira ida importante, Simeira kona-ba edukasaun iha loron 19 iha ONU, tanba ha’u iha komprimísiu iha ne’e, ha’u husu ba Maun Xanana para bele reprezenta estadu Timor Leste, reprezenta Prezidente da Repúblika”. Dehan Xefe estadu Jose Ramos Horta ba Jornalista sira iha Aeroportu Internasional, Dili, 14/09/2022
Entretantu, Simeira Mundiál kona-ba Edukasaun sei partisipa husi Xefe Estadu no Ministru Negósiu Estranjeiru husi nasaun oi-oin.
Tuir Xefe Estadu, Kay Rala Xanana Gusmão sei atende resepsaun iha loron 20 fulan Setembru ho Prezidente Estadus Unidos Amérika, Joe Biden.
Hafoin remata Simeira Mundiál Edukasaun iha Nasoens Unidas, Kay Rala Xanana Gusmão akompaña husi Ministra Negósiu Estranjeiru sei desloka bá Portugal hodi atende enkontru balun iha Lisboa.
Xanana Gusmão desloka ba rai liur ho aviaun Citilink no sei fila hikas mai Timor-Leste iha loron 5 fulan Outubru.
Jornalista : Vinsensius Saldanha Morais De Araujo
Editor : Dulçio Antonino da Silva