PR Horta Husu Orgaun Estadu Servisu Hamutuk, Tau Aas Interese Povu No Nasaun
SAPNewsTL, Dili: Prezidente Repúblika José Ramos Horta partisipa iha sesaun solene kinta lejislativa iha Parlamentu Nasional, Ramos Horta hateten orgaun Soberania haat hakru’uk ba prinsipiu separasaun no prinsipiu Interdependensia ba poder sira tau interese nasaun no povu nian a’as liu hotu interese pessoal no polítiku sira.
Hafoin partsipa iha sesaun solene kinta lejislativa iha Parlamentu Nasional Xefe Estadu José Ramos Horta haktuir relasaun entre Prezidente, Parlamentu, Governo no Tribunal, nu’udar relasaun resiprokal ida, atu kada orgaun soberanu ida depende ba orgaun sira seluk atu garante exersisiu lolos ba sira nia funsaun sira
“Interdependensia ejije kada orgaun sira to’o oras ne’e hanesan sira nia mandatu konstitusional permiti atu servisu hamutuk hodi garante la’os de’it unidade Estadu maibé mos funsionamentu di’ak ba ita nia Instituisaun demokratiku sira”. Dehan Prezidente Repúblika José Ramos Horta iha Parlamentu Nasional,Kinta-Feira, 15/09/2022
Xefe estadu hatutan poder sira prezidensial nian iha knaar importante atu garante unidade nasional no funsionamentu di’ak ba instituisaun demokratiku sira atu lori orgaun soberanu sira hotu hamutuk ba povu no nasaun nia interese.
“La signifika katak ita sempre konkorda malu ba buat hotu,ne’e la signifika katak la bele iha espasu atu iha debate duvida ka divizaun sira,maibe buat ne’e signifika duni katak to’o ikus, ita hotu tau interese nasaun no povu nian a’as liu hotu ita nia interese pesoal no polítika sira”. Prezidente fundamenta
Prezidente RDTL ne’e akresenta, Aleinde Xefe Estadu nia mandatu liu fulan haat ona no envolve iha dialogu no promove dialogu ho Tribunal Rekursus, Parlamentu, Governu no mos Povu.
“Ha’u mos envolve iha Dialogu ho Governu lokal, ho povu, envolve dialogu mos ho sektor nasional no internasional ho NGO sira, no mos ho organizasaun Internasional sira”. Nia afirma
Entretantu, prezidente ne’e realsa, nia servisu tiha ona ho Prezidente Parlamentu Nasional no Primeiru Ministru atu konkorda kona-ba Melloramentu minor ka substansial sira kona ba Lei sira balun ne’e molok ba promulgasaun.
“Kooperasaun hanesan ne’e sai esensial ba ita atu kontinua hadia servisu ba ita nia sistema konstituisional no alkansa objektivu termu ne’ebe uza barak, maibé dalabarak komprende sala, mak governasaun di’ak”. Nia hakotu
Jornalista: Vinsensius Morais
Editor: Sergio Delekuar