CNRT Kongratula PR Horta, TL Tenki Konsolida An

SAPNewsTL, DILI- Iha Sesaun Solene Parlamentu Nasionál Kinta Legislatura daikus nian, Bankada Congresso Nasional Reconstrução Timorense (CNRT) liu husi Deputadu Oscar de Araujo hato’o kongratulasaun ba Prezidente da Repúblika Jose Ramos Horta

“Ohin, V (Quinta) Lejizlatura Parlamentu Nasionál tama ba Lejizlativa dalimak nian, lejizlativa ikus ne’ebé marka ho prezensa husi Prezidente da Repúblika iha sesaun abertura ida ne’e, Iha okaziaun ida ne’e, Bankada CNRT dala ida tán kongratula Povu Timor-Leste ne’ebé hili ona nia Prezidente da Repúblika foun hanesan desizaun ida atu hakotu tiha korrente violasaun ba Konstituisaun da Repúblika ne’ebé akontese durante tinan 5 ikus ne’e”. tenik Deputadu Bankada CNRT Oscar de Araujo ba iha Parlamentu Nasionál Quinta ne’e, (15/09/22)

Entretantu, Deputadu ne’e akresenta Krize polítika-konstitusional lori ona tempu naruk, lori mós sofrimentu bo’ot ba estadu nia vida, hamosu problema sosiál barak no halo ekonomia povu hakdasak. Povu fó ona konfiansa ba Dr. José Ramos-Horta liu husi Eleisaun Presidensial núdar solusaun ida, atu bele buka meius hotu-hotu hodi rezolve problemas nasaun ida ne’e

“Akumulasaun problema krize polítika-konstitusional no sosio-ekonómiku núdar konsekuensias lójikas ne’ebé halo Timor-Leste lakon konfiansa ba investidores, kompañia nasionál no internasionál monu ba débito, setor privadu no kompañia barak bankarrota, hetok dezempregu aumenta sa’e maka’as halo joven rihun ba rihun sai ba rai liur buka servisu no iha tempu hanesan mal-nutrisaun mós sae maka’as, enkuantu, grupu kiik-oan goza mesak rekursu Estadu nian”. Dehan nia

Deputadu ne’e husu Prezidente Repúblika atu labele repete tán sala sira uluk, ejizi atu repoin fila fali povu ninia esperansa, dalan lós liu mak tenke asegura katak lala’ok estadu ida ne’e sei la’o tuir de’it koridor estadu de direitu demokrátiku

“Bankada CNRT husu ba polítiku sira ne’ebé lidera órgaun estadu nian atu Respeita no Hakru’uk de’it ba Konstituisaun da Repúblika, hodi labele repete hahalok violasaun hasoru Konstituisaun da Repúblika ne’ebé akontese iha tinan 5 ikus ne’e. Timor-Leste tenke konsolida-án atu kontinua no hametin prosesu konstrusaun estadu no nasaun, nune’e Timor-Leste sei sai estadu no nasaun ne’ebé polítika no ekonomikamente sustentável”. Nia sublinha

Enkuantu, Bankada CNRT husu partidu polítiku hotu-hotu atu tane ás interese estadu no nasaun nian liu interese partidu nian, nune’e la’ós buka de’it atu hetan podér. Partidu tenke kuda sentidu nasionalizmu no patriotizmu ba iha nia kuadru no militante sira, atu nune’e, hatene haketak diferensa entre interese nasionál no interese partidária ka interese grupu nian

Jornalista : Antonio Tilman

Editor       : Luis Pailofo