Seidauk To’o Ospitál, Eis Vise Ministru Saúde Luis Lobato Hakotu Iis
SAPNewsTL, Dili : Rogério Lobato haktuir Saudozu Luis Lobato hakotu iis, tanba hetan atakasaun iha meia noite maiz ou menuz tuku 12 Madrugada, Familia Lobato konsidera hanesan soke ida, supreza no laran trizte ida ba sira tanba nunka espera Luis Lobato bele mate derepente iha momentu ne’ebe nia diak hela
“Hori kalan iha Meia Noite mak nia hetan atakasaun derepente, Nia Muta, no lori ba Ospitál maibe ikus mai nia mate, dala ruma iha liur ita haree diak hela, maibe la espera iha isin loron laran ne’e iha problema, ami nunka espera katak nia bele mate derepente, Ba Ami Familia Lobato sente soke no supreza, laran todan no trizteza boot tanba nia diak hela,” Tenik Rogerio Lobato ba SAPNewsTL iha Delta Nova, 18/06/2023
Rogério Lobato akresenta “Orseik iha Meia Noite, nia sente la diak, nia bolu nia oan atu halo passajem, nia sente atu muta, nia muta tiha, liu tiha minutu balun nia sente ladiak, nia dehan nia hirus matan ne’e moras, nia toba taka rabat deit, maibe labele liu ona, atu lori ba ospitál Nasionál Guido Valadares maibe la biban ona entaun lori ba ospitál stand for clinic, maibe nia iis kotu iha dalan”.
Rogériu hatutan, Saudozu nia espoza ba halo chek up iha Rai-liur, entaun nia to’o mak nia hola desizaun kona ba velória iha Dili no Hakoi iha Leorema tanba Familia Lobato hakoi hotu iha ne’ebá
Iha Fatin Hanesan, Eis Membru Comité Central FRETILIN (CCF) José Agustinho Somotxo sente trizte tanba lakon nia Companheiru da Luta ida ne’ebe nakonu ho Persisténsia, Firmeza no Konsistensia iha luta ba objetivu komun
“Ami sente trizte tanba lakon ema importante ida ne’ebe nakonu ho persisténsia, Konsistensia no firme iha luta ne’ebe la’os ba nia interese maibe ba interese povu no nasaun nian, nia mate sei fo koragem liu tan mai ami hodi kontinua luta ba objetivu ne’ebe ami seidauk to’o”. Tenik Somotxo
Eis Vise Ministru Saúde, Koordenador Partidu Frente Revolucionário Timor Leste Independente (FRETILIN) Munisipiu Likisa Luis Lobato mate husik Hela Oan Mane Na’in Tolu (3) hamutuk Nia Espoza.
Enkuantu, Daudaun ne’e saudozu Luis Lobato nia mate isin sei iha hela nia rezidensia Delta Nova Dili hodi halo velória, tuir planu sei ba hakoi iha Leorema Munisipiu Likisa