28 Novembru ! Pe. João Konsidera Funsionáriu Públiku La Hatudu Ezemplu
SAPNewsTL, Manatuto – Selebra misa agradesementu ba loron proklamasaun Independensia ba dala 48, Padre João Hornai senti triste tanba funsionáriu públiku Postu Administrativu Soibada la partisipa masimu iha misa agradesementu.
Ohin igreja katolika iha Timor laran tomak realiza misa agradesimentu ba loron proklamasaun Independensia ba dala 48⁰, inklui Paroquia Antigu Sagrado Coração de Jesus, Soibada, realiza misa ho sentidu hodi agradese ba sakrifisiu heroi no heroina sira nia luta ba ukun rasik aan.
“Hau triste los tanba funsionariu sira ne’ebe hambrik hanesan dirijente iha linhas ministeriais sira, iha postu administrativu Soibada, la partisipa masimu iha misa agradesementu hodi valoriza historia funu nain sira nia luta ba ukun rasik an, funsionario sira la uza kompetensia hanesan intelektuais ida hodi hatudu ezemplu diak ba foinsa’e sira”. Hateten Padre paroquia sagradu coração de Jesus Soibada iha nia homilia Segunda (27/11/2023)
Iha Homilia padre João Hornai, haklaken ohin nu’udar loron ne’ebe nakonu ho sentidu ba jerasaun foun sira, atu lembra hikas historia uniku Timor-Leste nian hodi husu nai maromak nia grasa haraik justisa ba heroi sira ne’ebe sakrifika ona sira nia an ba mate hodi liberta povu no liberta patria husi inimigu nia liman kroat.
“Timor-Leste restaura nia Independensia tinan 21 ona maibe joven sira vinga malu, insulta, tolok malu la hatene respeita inan ho aman no nain ulun sira, tamba ita nia lider komunitariu ho funsionario sira la tau importansia ba loron nasional ne’ebe proklama husi asu wain sira ho aten brani hodi konkista Timor-Leste nia Independensia unilateralmente ba mundu internasional”.
Historikamente ne’ebe funu nain sira proklama iha loron 28 tinan 1975, dever no obrigasaun hanesan sidadaun Timor, nu’udar funsionariu ida tenki tane as espiritu heroi sira nian hodi enkoraja foinsa’e sira liu husi hahalok, partisipasaun iha momentu importante sira hanesan ne’e. Maibe kuitadu triste teb-tebes tanba hare funsionariu, veterano, no lider komunitariu sira iha postu administrativu Soibada la tau importansia hodi partisipa iha misa agradesementu.
Enkuantu hafoin hala’o misa agradesémentu iha igreja, Soibada sarani sira hamutuk ho administratrador postu, padre paroku no lider komunitariu balun lori aifunan ba kari iha semiteriu rate mean, nu’udar simbolu agradesementu ba heroi sira.
Entertantu, iha misa agradesementu ne’e partisipa deit husi administratrador postu, Komandante eskuadra, sefi suku nain rua (2) sefi sentru saude, veteranu balun no komunidade suku lima iha Postu administrativu Soibada Munisipiu Manatuto.
Jornalista : Guilhermino Ramos da Cruz