Selebra Aniversáriu Daruak ! Konselleiru AS Legumau Husu Tane Aas Naran Diak Assosiasaun
SAPNewsTL, Lautem: Hafoin Assosiasaun Legumau (ASL) selebra aniversariu ba dalarua, Iha Munisipiu Lautem, Postu Administrativu Luro, Suku Baricafa. Konseleiru Casimiro dos Santos husu membru sira atu tane a’as Assosiasaun no lori ASL ba futuru ida di’ak liu.
Iha intrevista ho Vise Presidente Asosiasaun Legumau Hipolito Morreira haktuir nia sente orgullu tanba asosiasaun nia ezistensia ne’e hetan apoiu makaas husi komunidade sira nune’e sira hamrik ona tinan rua no iha esperansa ba oin asosiasaun Legumau sei diak liu tan.
“Sente orgullu tanba komunidade hotu-hotu liuliu komunidade Baricafa ninia apoiu, suporta As. Legumau eziste ona tinan rua nafatin husu ba parte hotu-hotu hanesan husi parte estadu parte relijioza no ba hotu-hotu atu nune’e suporta nafatin hodi As. Legumau ba futuru bele la’o ho di’ak liu tan”.
“Esparansa bo’ot ba futuru sei kolabora di’ak liu tan ho autoridade lokal sira nomos nasional sira atu oinsa bele lori As. Legumau ida ne’e ba oin ho programa sira ne’ebe iha”. Dehan Vise-Prezidente ASL Hipolito Morreira ba Mídia SAPNewsTL hafoin remata missa agradesimentu iha Kapela Baricafa, 30/10/2023
Konselleiru Assosiasaun Legumau Casimiro dos Santos informa maske dezafiu barak asosiasaun ne’e hasoru maibe tanba hetan apoiu husi Baricafa oan sira nune’e bele hamrik ona tinan rua no bele realiza aktividade ida ne’e.
“Husi inisiu wainhira atu loke organizasaun ida ne’e, há’u rasik admira oituan tanba haree difisil la halimar maibe tanba ita nia unidade asosiasaun ne’e bele hamrik, prosesu preparasaun to’o realizasaun ba programa ida ne’e iha apoiu lubuk ida ne’ebe hetan husi maun alin sira husi rai liur; Australia, Inglaterra no Korea.”
“Ita tenke agradese ba sira tanba sira servisu barak, responsabilidade ba sira nia família maibe sira prontu nafatin husi inisiu to’o realizasaun aniversariu ba dala rua ida ne’e”. Tenik Casimiro
Konselleiru ne’e tatoli ba membru sira atu kontinua tane aas nafatin naran diak Asosiasaun nian no husu parte hotu atu partisipa aktividade asosiasaun nian hamutuk hodi lori Asosiasaun ba oin.
“Nu’udar konseleiru asosiasaun no fundador ba ASL husu nafatin ita bo’ot sira nia partisipasaun para atividade ne’ebe mak ita planea ne’e bele la’o ho susesu, klaru katak ita sei hasoru dezafiu maibe há’u fiar katak ba oin ita sei hetan rezultadu ba oin nu’udar konseleiru sei iha apoiu tomak tanba ne’e husu membru sira hotu atu nafatin kontinua tane aas lori ASL ne’e ba oin”. Nia hameno
Entretantu, foinsa’e feto ida ne’ebe durante konkorente ba diskursu publiku Madalena dos Santos parabeniza asosiasaun no agradese ba sira nia prezensa iha Suku Baricafa hodi realiza atividade lubuk ida hodi selebra sira nia aniversariu ba dala rua.
“Há’u nia parabéns ba asosiasaun Legumau ne’ebe selebra ona aniversariu ba dala rua, há’u orgullu no no agradese teb-tebes ba asosiasaun Legumau tanba iha selebrasaun aniversariu ne’e preense ho atividade lubuk ida liliu diskursu públiku bele mentaliza no kapasita ami foinsa’e sira hodi bele aprende halo mudansa”. Nia relata
Entretantu, selebrasaun aniversariu Asosiasaun Legumau nian ba dala rua ne’e hala’o ho aktividade lubuk ida hanesan sertame, diskursu publiku inklui aktividade ultural sira seluk hanesan dada tali no halai karon nomos ho missa agradesimentu ba ezistensia asosiasaun nian
Jornalista: Luis Pailofo