Senadu Estudantil UNITAL, Isac Kandidata An Ba Xefe Suku Iha Ainaru

SAPNewsTL, Dili : Relasiona ho festa demokrasia ne’ebe povu Timor Leste sei festeza hodi hili líder komunitária iha loron 28 fulan Outubru tinan ne’e, Universidade Oriental Timor Lorosa’e (UNITAL)Nia Senadu Estudantil Isac Soares de Araújo afirma sei kandidata an ba Xefe Suku Mau-Lau tanba hakarak hadia dezenvolvimentu iha area rural

“Ita bazeia ba lei nú 9/2016 ne’ebe atribui ba sidadaun hotu ne’ebe ho idade 17 ba leten, iha direitu hodi kandidata an ba xefe suku, Timor Leste tempu ona presiza ema ne’ebe iha vontade inovativu, kompetividade no kreatividade hodi dezenvolve suku, tanba buat barak ne’ebe presiza duni hodi hadia ba oin”.Tenik Kandidatu Xefe Suku Mau-Lau Isac Soares de Araújo ba SAP News iha Metinaru, 04/10/2023

Kandidatu Xefe Suku ne’e afirma sei transforma Mau-Lau sai suku ne’ebe prósperu, organizadu no hakmatek hodi kompete iha nivel Nasionàl tanba nia konsidera tempu ba dezenvolvimentu mak agora no dezenvolvimentu tenki hahu husi baze

“Ha’u Isac, prontu no preparadu ona hodi servi, Ha’u mai vizaun ida katak Mau-Lau ida prósperu, organizadu, tranquilidade tuir Objetivu Dezenvolvimentu Sustentável (ODS), ne’ebe la husik ema ida iha kotuk, katak sei transforma Suku kompete iha nivel Nasionàl”. Isac Soares de Araújo hateten

Estudante Fakuldade Agrikultura UNITAL ne’e aprofunda, nia hakarak kria kooperativa suku, desportu komunitária, to’os komunal no promove paz no estabilidade hodi dezenvolve suku hahu husi baze

“Se eleitu ba Xefe Suku, Ha’u sei loke to’os komunal, kria kooperativa suku, dezenvolve modalidade desportu, promove paz no estabilidade hodi dezenvolve suku hahu husi baze, ho programa hirak ne’e, nia garante sei konkista vitória tanba Aman Inan no joven sira kunhese ha’u, tanba sira mak kandidata ha’u, Ha’u fiar no optimista sei manan”. Nia promete

Enkuantu, Isac Soares agora daudaun hanesan Senadu Estudantil iha UNITAL, involve iha Assosiasaun Estudantil Munisipiu Ainaru (ASEMA), Membru Ryla Rian no inklui organizasaun voluntáriu sira ne’ebe sempre kontribui ba dezenvolvimentu Komunitáriu tanba ne’e nia sente katak iha kapasidade no experiensia naton hodi lidera Suku Mau-Lau ba Periode 2023-2030

 

Lembra fali katak, Guvernu Timor Leste liu husi Konsellu Ministru dekretu ona data Eleisaun Líderansa Komunitáriu, Nune’e Kandidatu Xefe Suku sira sei submete ba komisaun eleisaun suku iha loron 13 Fulan Outubru 2023, entretantu kandidatu Xefe Aldeia no delegadu no delegada sira sei submete sira nia kandidatura iha loron 28 Outubru

Jornalista : Domingos Ferreira Conseição