Senadu Jerál Alerta Ba Estudante UNTL ! Fo Hatene Wainhira Hetan Ameasa

SAPNewsTL, Dili : Durante partisipa iha Komunikadu Imprensa ne’ebe halo husi estudante Departamentu Pescas e Ciência Marinha (DPCM), Fakuldade Agrikultura (FAGRI), Universidade Nasional Timor Lorosa’e (UNTL) kona ba dosente ne’ebe fo ameasa, Senadu Jeral UNTL Cristovão de Araújo husu Estudante hotu ne’ebé estuda iha UNTL hodi hato’o keixa ba senadu sira kada Fakuldade wainhira hetan ameasa

Senadu Jeral UNTL Cristovão de Araújo haktuir, aktu ameasa estudante lalos aktu ne’ebe eduka estudante maibe hatauk estudante, halo estudante la seguru no halo estudante psikolojikamente la seguru iha prosesu ensinu

“Aktu ameasa estudante lalos aktu ne’ebe eduka estudante maibe hatauk estudante, dosente ne’ebe profisional no iha maturidade, tanba ne’e husu ba estudante hotu iha UNTL hodi hato’o keixa ba senadu sira wainhira hetan ameasa husi dosente sira, estudante labele aprende iha problema nia laran, Estudante tenki sente seguru hodi tuir prosesu ensinu aprendijajem”. Tenik Senadu Jeral UNTL Cristovão de Araújo ba jornalista sira iha Kampus Sentral UNTL, 20/10/2023

Leader Estudante UNTL ne’e fundamenta, aktu ne’ebe mak Professor Doutor Abilio da Fonseca halo hodi ameasa estudante Departamentu Pescas e Ciência Marinha ne’e aktu intimidasaun ne’ebe kontribui ba estudante la seguru aprende iha prosesu ensinu aprendijajem

“Professor Doutor Abilio da Fonseca ne’ebe ameasa estudante Departamentu Pescas e Ciência Marinha, ami konsidera katak aktu ne’e intimida no kontribui ba estudante la seguru iha prosesu ensinu aprendijajem, se estudante krítika dosente nia aktu ne’ebe lalos, dosente tenki justifika la’os ameansa”. Nia dehan

Senadu Jeral UNTL ne’e akresenta, estudante mai universidade lalos atu adora dosente, maibe atu aprende siénsia no buka lialos

“Estudante mai universidade atu buka siénsia hodi aprende no buka lialos lalos atu adora dosente, ami husu estrutura universidade atu kria kondisaun ida hodi halo diskusaun aberta, UNTL iha regras, normas no kódigu konduta hodi regula wainhira estudante halo sala.”

Cristovão de Araújo konsidera dosente ne’ebe fo ameasa estudante ne’e wainhira estudante kritika, signifika dosente ne’e la kompriende konstituisaun Repúblika Demokrátika Timor-Leste artigu 40⁰ kona ba liberdade ko’alia no informasaun ninian

“Dosente ne’ebe la kompriende lei no regra maka dosente Abilio da Fonseca, ami dejafiu (Sadik), se la simu, ami prontu debate ho nia tanba nia la kompriende saida mak hakerek iha konstituisaun kona ba liberdade expresaun”. Senadu Jeral UNTL sublinha

Entretantu, antes ne’e deskonfia dosente ida iha Departamentu Pescas e Ciensia Marinha ida mak ameasa estudante tanba kestiona kona ba valor ne’ebe fo ba estudante sira la transparente no hamosu diskriminasaun ba estudante sira

Bendito dos Santos informa, Departamentu Pescas e Ciência Marinha, iha Dosente ida naran Dr. Abilio da Fonseca, atualmente exerse hela funsaun nu’udár Diretor Departamento Pescas e Ciência Marinha iha ne’ebé ameasa estudante tanba estudante sira ezije sira nia direitu kona ba valor ne’ebe fo la nakloke no hamosu desigualidade

“Estudante ezize direitu no kestiona transparênsia sira kona ba valor, maibé dosente refere hatan ba estudante nia preokupasaun ho liafuan ameasa dehan “imi sai ha’u nia Inimigu Permanente no ita boot sira sei kona ajar bainhira kontra saida mak ha’u halo”, no aktu ida ne’e sei akontese nafatin iha prosesu aprendisajem”. Bendito dos Santos hateten

UNTL mos estabelese Grupu Traballu Tékniku Inisiativa Kampus Seguru (GTTT-IKS) hodi luta no promove Kampus seguru no saudável ba estudante sira hotu iha UNTL, maske nune’e maibé estudante sira sei kontinua hasoru diskriminasaun oioin iha Universidade

Relasiona ho kazu SAP News tenta halo komfirmasaun ho estrutura parte Fakuldade Agrikultura no Universidade Nasionàl Timor Lorosa’e (UNTL) maibe seidauk fo resposta ba kazu refere

Jornalista : Ermelinda Soares