Simu Bensa Direta Husi Papa Francisco ! Joana : Maromak Nia Planu Sempre Furak Ba Ita

SAPNewsTL, Dili – Jerente Telkomcel  no Voluntária ba Vizita Santu Padre Papa Francisco, Joana Pereira Miranda  sente kontente bainhira hetan bensaun no simu tersu direta husi Papa Francisco.

Joana Miranda konsidera simu bensaun no tersu ne’e nu’udar grasa no domin Maromak nian ne’ebé nia hetan iha momentu istóriku vizita Papa Francisco iha Timor-Leste liliu iha Koléjiu Irmã Alma.

“Ha’u sente orgulloza no gratidaun tanba bele simu bensaun no tersu direta husi Santu Padre Papa Francisco, ha’u haree ida ne’e nu’udar grasa boot ne’ebé ha’u simu tanba mai hosi fiar no orasaun ne’ebé ha’u iha durante ne’e”.

“Nu’udar sarani labele baruk atu reza tersu iha ita nia familia, Maromak nia planu buat hotu furak tuir nia tempu, kontinua reza tersu atu husu Nain Feto bele akompanha ita nia aktividade tomak”. Tenik Jerente Telkomcel Joana Pereira Miranda ba SAPNews iha Timor Plaza, 12/09/2024

Jerente Telkomcel ne’e fundamenta, hafoin Santu Padre Papa João Paulo II vizita, liu tiha tinan 35, Papa Francisco Vizita  Timor-Leste, momentu istóriku ne’e fo inspirasaun ba Timoroan hotu katak presiza moris ho  valoriza malu, tane malu, proteze malu no serví malu sai kultura moris sosiedade nian.

“Tinan 35 depoisde vizita husi Santu Joao Paulo II mai Timor Leste, hafoin Papa Franciaco vizita sarani katolika iha país ida ne’e nu’udar sarani iha fatin servisu nian no familia boot Telkomcel nian, ita kontinua valoriza malu, tane malu no proteze malu, koko nafatin atu haraik an, moris simples hanesan Santu Papa Francisco dehan”.Sublinha Joana Pereira Miranda

Feto potensial ne’e hatutan, “Sarani tenki hametin ita nia fiar, atu fiar ne’e rasik bele sai ita nia kultura, iha Telkomcel ami sempre hahú aktividade hotu ho orasaun no taka semana servisu ho orasaun”.

“Operador Telkomcel la’os deit fornese linha hodi konekta ema ho ema, maibé sita mos referénsia husi Embaixador Indonesia katak Telkomcel konekta ema ho Maromak, hanorin ita oinsa haboot ita nia fiar.  Buka aprende barak no servisu ho liberdade ne’e parte ida importante hodi ema bele sente paz no fraternidade umana iha ambiente servisu tanba ami iha multirelijaun mak servisu hamutuk maibe respeitu malu no la iha diskriminasaun”.

Joana Pereira salienta, iha era teknolojia ema barak uza sala teknolojia no mosu ona degradasaun moral hodi insulta malu, tolok malu no hatun ema nia dignidade”.

“Ohin loron  ema barak uza sala teknolójia, wainhira ita hatene uza teknolojia hodi tulun ita ho hafasil ita nia servisu, maibe realidade hatudu degradasaun moral hahu buras iha Timor Leste, tanba ema barak uza teknologia hodi halo mal trata ba ema seluk hodi hatun dignidade ema nian”. Nia.dehan

Joana Pereira sublinha “Padre barak presiza kontinua fo formasaun ba foinsa’e sira atu lori hikas sira ba dalan ne’ebé diak hodi fanu sira uza teknologia tuir nia dalan hodi bele kontribui ba dezenvolvimentu nasaun no creda.

Feto Potensial ne’e mós husu ba makaer ukun sira liliu lider nasionál sira atu bele hamutuk hodi dezenvolve nasaun sai dezenvolvidu, modernu, prósperu no sivilizadu.

“Mensagem ba lider sira hodi  buka hadame malu hodi bele hamutuk dezenvolve Timor-Leste sai pais dezenvolvidu no sivilizadu. Ba foinsa’e sira kontinua aprende respeita malu, no halo barulhu hanesan Papa Francisco dehan maibe tenki halo barulhu ba buat ne’ebé positivu no fo valor diak ba nasaun no Kreda”. Nia husu

Iha Fatin hanesan, Asistente Tékniku Adri Lebre senti kontente teb-tebes tanba konsege hetan bensaun direta  husi Santu Padre Papa Francisco

“Sente kontente ho matan-wen nakonu tanba bele hetan bensaun direta husi Papa Francisco, grasa boot ne’e dala ruma Maromak nia planu para hakbesik liután ita ba Maromak no uma kreda”.

Joven ne’e husu ba ba nia maluk foinsa’e sira hodi haklaken paz no unidade, buka hakbesik an ba Maromak hodi moris tuir nia ukun fuan.

“Mai ita hotu haklaken damen, unidade no fraternidade,  hakbesik an ba uma kreda, hadia ita nia mentalidade hodi kontribui ba uma kreda no ita nia nasaun.”

“Igreja tenke hakbesik an ba nia joven sira, aplika mós iha eskola sira kada semana tenke reza hamutuk no haklaken biblia, agradese ba maromak tanba sempre fo bensa mai ha’u nia pessoal, kompanha no mós ba ita nia nasaun Timor-Leste”. Adri sublinha

Durante estádiu iha Dili, Santu Padre husu joven sira atu kuda mehi boot, hatene halo barullu, uza liberdade hodi hala’o ninia responsabilidade hodi serví ninia maun alin sira iha Timor-Leste tanba foinsa’e sira mak futuru no forsa ba nasaun.

Enkuantu, Santu Padre Papa Francisco vizita Timor-Leste iha loron 9-11 fulan Setembru tinan 2024, oras ne’e Santu Padre  iha fali ona Vatikanu hodi hala’o nia knaar nu’udar Xefe Estadu Vatikanu no Lider Mundial Igreza Katólika.

Jornalista : Dulçio Antonino & Ermelinda Soares