Susar Ba Bee-Moos ! Komunidade Likisa Konsidera BTL, E.P La Funsiona

Imajem : ASEMUL & Komunidade hala’o komunikadu imprensa kona-ba problema bee-moos iha Likisa Villa, 28/03/2025

SAPNewsTL, Likisa : Assosiasaun Estudante Munisípiu Likisa (ASEMUL) hamutuk ho Sociedade Civil no komunidade sira realiza komunikadu imprensa kona-ba problema bee-moos.

Prezidente ASEMUL,Natalizio Nunes Martins husu ba Presidente Autoridade Munisípiu Likisa hodi orienta diresaun BTL, nune’e bele ezerse ninia funsaun ho diak hodi garante sustentabilidade bee-moos ba komunidade.

“Durante ne’e komunidade sira ezije ona ba autoridade munisípiu Likisa liliu BTL maibe to’o ikus laiha rezultadu pozitivu ruma to’o ohin loron komunidade kontinua halerik ba bee-moos”.

“Problema ne’e seriu tebes tanba ita hotu hatene katak bee-moos nu’udar nesesidade bázika ba komunidade sira no familia uma laran, bainhira bee laiha susar ba ita atu moris tanba ne’e husu autoridade liliu BTL atu rezolve imediatamente bee-moos iha munisípiu Likisa”,Dehan Prezidente ASEMUL Natalizio Nunes Martins ba SAPNews iha Likisa, 28/03/2025.

Porta voz ne’e husu ba autoridade munisípiu Likisa atu xamada atensaun no orienta BTL atu bele rezolve problema ne’ebe komunidade sira hasoru tanba povu iha rural ladauk asesu bee.

“Kuaze iha Likisa vila seidauk asesu hotu ba bee-moos tanba deit bee laiha sira uza sira nia osan rasik atu hola bee kada semana no fulan ida ami hola dala ha’at”.

“Ami la menta tebes mesmu ita hatene katak iha Likisa iha diresaun BTL,E.P, sira simu osan bo’ot kada fulan tanba ne’e ami ezije para labele mosu tan ida ne’e ba futuru, servisu iha instituisaun estadu liu liu bee-moos ne’ebe ita distribui ba komunidade sira, ita tenki ezerse funsaun ho diak”. Nia husu

Komunidade Luis Gonjaza dos Santos haktuir komunidade Likisa Villa halerik ba bee-moos desde tinan 2001 to’o 2025.

“Komunidade sei halerik nafatin ba bee-mo’os, signifika ita gasta ona osan barak maibe seidauk iha mudansa pozitivu, problema esensial iha rua maka debit bee iha bee-matan mak menus jestaun no no menus ne’e responsabilidade hosi governu”.

“Ita ko’alia dehan povu tenki moris ho saudável, maibe saudável oinsa nian kuandu bee la iha, oinsa labarik sira tenki moris ho ijiene, enkuantu bee laiha, labarik sira ba escola tenki haris moos, ema iha uma tenki hemu bee-moos, bee laiha ne’e atu halo nusá, ne’e susar, ohin mak ita foin ko’alia ba públiku mas problema ne’e existe kleur tiha ona”.

Imajem : ASEMUL & Autoridade Lokal Aldeia Kamalelara hala’o komunikadu imprensa

Komunidade Leopa Bernadete Palmira do Santos sente triste tebes tanba la asesu bee-moos no dala barak gasta osan hodi sosa maske susar atu hetan osan iha area rural.

“Ami sente triste tebes tanba la hetan bee-moos, kada vez semana ida ami hola bee dala ruma ami uja loron tolu ou haat deit, ami hola hela deit bee ne’e lori saida selu oan sira-nia escola, ami fakar osan ba bee diak liu ami selu ami nia oan sira nia eskola ba sira nia futuru abanbairua”.Nia dehan

Leopa mos husu ba representante povu iha uma fukun Parlamentu Nasional hodi bele defende povu nia lian, nune’e BTL bele tau atensaun ho sériu ba komunidade sira.

“Ami husu ba boot sira iha liquisa ne’ebe tur iha uma fukun Parlamentu Nasional halo favor tau matan ba bee ne’e, ami husu ida ne’e deit, tanba avizu dehan kuidadu saúde maibe bee la iha ne’e, ami atu kuidadu oan sira-nia saúde husi ne’ebe”.

“Ami komunidade ezije ba bo’ot sira para bele resolve tanba uluk Servisu Água e Saneamento (SAS) ne’e sei diak, dala ruma bee la iha sira esforsu no ami bele hetan netik bee agora ida ne’e la iha liu. Durante ne’e ami sosa bee kada litru ida folin $ 3, maibe tenki masa tolu entuan ami sosa $9 maibe kuandu ema barak ita uja la to’o semana hotu ona entaun ita tenki sosa hela deit”.

Grasiano Pires do Santos konsidera BTL ne’e la funsiona, fo sala ba BTL nasional ne’ebe halo rektutamentu, tanba ema na’in 20 ne’ebe uluk serbisu iha SAS ho osan ne’ebe mak $80 maibe bee ami asesu ho diak.

“BTL ne’e la funsiona, ami fo sala BTL, E.P, uluk SAS ema simu fulan ida $ 80 maibe ami asesu bee ho efetivu”.

“Maibe depois entrega ba BTL tanba maioria funsionáriu foun deit no sira nia experiénsia mós menus entaun sira la hatene kanalizasaun kanu bee nian, tanba ida ne’e mak rekomenda ba governu liuliu ba PAM-Likisa hodi fo atensaun tanba dalaruma relatóriu diak deit maibe realidade komunidade nia terus iha Likisa ne’e sira la hatene”. Nia hakotu

Iha sorin seluk, manorin no alunu pre-eskolar Pederos Likisa Villa mós la asesu bee-moos, ikus mai estudante no inan aman mak tau osan no kuru bee ba eskola refere tanba laiha bee.

Ligadu ho preokupasaun ne’e, SAPNews tenta atu halo konfirmasaun ho parte Presidente Autoridade Munisípiu Likisa no BTL Munisípiu maibe la konsege tanba laiha servisu fatin.

Antes ne’e, SAP News TL mós halo ona konfirmasaun ho parte BTL, E.P nasional hodi aktualiza problema bee-moos maibe to’o agora seidauk fo resposta ba karta refere.

Jornalista : Ermelinda Soares