Taça Esperança 2023, ES Nicolau Lobato Kontra SACROJES Iha Abertura
SAPNewsTL, Dili: Eskola Sekundaria Nicolau Lobato sei kontra Eskola Sekundaria Sagrado Coração de Jesus (SACROJES) iha abertura Taça Esperança 2023 tanba liu dada sorteiu ekipa rua hamutuk iha grupu A
“Ohin ita la halo technical meeting atu esplika regra jogu ba treinador ho jogador sira maibe ita dada sorteiu deit hodi fahe eskola sekundaria 16 ba grupu haat deit”, dehan Koordenador Komissaun organizador Taça Esperança 2023 Domingos Caeiro liu husi nia diskursu ba jornalista sira iha salaun City 8 Manleuana, Dili domingu (27/08/2023).
Domingos hatete, sira hakarak agredese tebes ba partisipasaun husi fundador Tasa Esperansa, jogador lejendariu sira ho jogador jerasaun foun Paulo Gally Freitas hamutuk ho asosisaun futebol sira no estrutura FFTL Vise Prezidente no Sekretariu Jerál ho reprezentante eskola sekundaria 16 ne’ebe marka prezensa iha dada sorteiu ne’e.
Iha Fatin hanesan, Fundador Nilton Gusmão hatete, uluk sira fundador sira hari’i kompetisaun ho difisil maibe kontente tanba depois mosu konflitu iha 1999
“Taça Esperança ne’e uluk Ha’u hamutuk ho Akita Tama Laka, Joel Campus no sira seluk tan hari’i iha radiu FALINTIL ho difisil maibe kontente tanba halibur joventude pratika futebol labele moris stres depois mosu konflitu iha 1999”,
“Taça Esperança agora ba datoluk, kompetiasaun dahuluk klube Zebra ho Cacusan kampiaun hamutuk deit tanba joga tempu normal to’o suta penalidade impata hotu, ba daruak sira tenki para iha dalan klaran tanba mosu problema no tinan ne’e ba datoluk partisipa husi eskola sekundaria 16”, dehan Nilton
Nilton informa tan, Taça Esperança 2023 atu fo oportunidade ba estudante sekundaria pratika futebol hodi espiritu kompetividade tanba sira estuda durante tinan tomak hein katak kompetisaun realiza estudante sira bele kria relasaun ba malu entre eskola sira tanba joventude mak futuru nasaun nian
Nune’e tenki organiza sira labele koalia deit, iha grupu kiik husu nia tulun tan ne’e hau sente orgullu hodi kontribui para kompetisaun ne’e bele lao no ohin dada sorteiu hein katak atividade bele lao diak, deseju susesu ba estudante sira iha Taça Esperança 2023
Nia afirma, uluk sira hamosu Kopa Esperansa tanba sira iha esperensa ba Nasaun Timor-Leste nia futuru depois mosu konflitu iha 1999 ne’ebe juventude hotu iha esperansa ida katak moris iha ambiente liberdade ne’e espresa direitu no talentu
“Kompetisaun lakon kleur tiha depois mosu Federasaun Futebol Timor-Leste nune’e sira hanoin federasaun bele hamosu atividade futebol iha Timor-Leste no agora kompetisaun ne’e mosu fila fali tanba organiza husi grupu kiik oan ida nune’e Ha’u fo apoiu hein katak bele sai atividade regular ida ba tinan barak oin mai”.
Nune’e fo espasu ba joven sira pratika futebol no proposta komisaun organizador fo ba Nilton Gusmão ho montante 30,000 USD no nia aprova duni ba komisaun organizador realiza Taça Esperança ne’e
Iha sorin seluk, Vise Prezidente FFTL Jeneral Falur Rate Laek fo agradese ba Komissaun Organizador ne’ebe hola inisiativa hodi realiza kompetisaun ne’e
“Ha’u agradese no fo saudasaun ba komisaun organizador iha inisiativa realiza Taça Esperança 2023 ne’e halibur ema, hein katak kompetisaun ne’e lao ba oin ho diak tanba kompetisaun bola ne’e agora famozu iha mundu no kompetisaun ida ne’e bola ne’e ema kuda hanesan du’ut para nia fini ne’e Timor Laran tomak lori ba mundu no kria paz no estabilidade iha Timor-Leste”, tenik Falur
Iha biban hanesan,treinador Balzano M. Gonzaga Informa, sira senti kontente bele partisipa iha kompetisaun tanba esensial ba estudante sira.
“Ami husi Eskola sekundaria Sagrado Coração de Jesus sente kontente bele partisipa Taça Esperança 2023 ne’e tanba eventu esensial tebes ba estudante sekundaria sira no importante tebes ba amante futebol sira atu asiste”, dehan Balzano
Entretantu, iha dada sorteiu Taça Esperança 2023 eskola sekundaria 16 fahe ba grupu ka pool haat, A, B, C no D
Nune’e iha grupu A kompostu husi ESG Nicolau Lobato Tasi Tolu, ES Sagrado Coração de Jesus Becora , ES Cafe Taibessi ho ES Sta. Madalena Canossa Manleuana,
Iha grupu B kompostu husi ESG 12 de Novembro Becora, ES São Pedro Comoro, ES Externato São José ho ESTV EEC Becora
Iha grupu C kompostu husi ESG 5 de Maio Becora, Colegio São Miguel Arcanjo, Colegio São José Operario Balide ho ESG 4 de Setembru
Iha grupu D kompostu husi Colegio São Paulo VI, ES Cristal, ES An-nur no ESG Herois da Patria, bazeia ba grupu tan ne’e jogu abertura ESG Nicolau Lobato sei kontra SACROJES iha loron 30 fulan Agostu 2023 iha kampu demokrasia.
Reportajen: Augusto dos Santos