Taur : VIII Governu Ho Progresivu ! IX Governu Hili Dalan Sobu
Imajem : Eviksaun ba komunidade Fomentu II, Suku Comoro, 07/01/2025. Foto : Arkivu SAPNews
SAPNewsTL, Díli : Eis Primeiru Ministru Taur Matan Ruak konsidera asaun eviksaun ne’ebe implementa hosi SEATOU ne’e aktu desumanu, kruel no radikal.
Eis Prezidente Repúbliku Taur Matan Ruak kritika makaas ba despezu administrativa ne’ebe IX Governu halo liu husi Sekretáriu Estadu Asuntu Toponomia no Organizasaun Urbana Germano Santa Dias Brites.
“Ha’u nia pozisaun kona-ba despezu administrativa, ha’u kritika makas tanba ne’e kruel no dezumanu, liafuan ne’e todan liu. Ita iha dalan rua hodi halo dezenvolvimentu sidade Díli ida maka progresivu, la’o ho neineik prepara uluk kondisoens hafoin avansa no ida seluk maka radikal. Iha ha’u nia tempu hanesan Primeiru Ministru hili maka ida progresivu maibe avo Nana nia tempu iha nonu Governu hili radikal no sobu”.Tenik Eis PM Taur Matan Ruak iha Farol, 29/01/2025
Matan Ruak hatutan, “Agora tanba saida maka sobu? Iha lian Portugés hanesan ne’e “urgente é aquilo que você esqueceu de fazer no passado”, urjente maka buat ne’ebe uluk ó haluhan halo”.
“CNRT ukun dala hira ona ? Iha IV, V, VI governu no iha VIII sira ukun maibe ukun la to’o rohan sai tiha depois mai iha IX governu sira ukun fali, nune’e sira haluhan halo agora hanoin hetan sira hili dalan radikal. Tanba saida maka hili dalan radikal? Tanba avo nia tempu laiha ona tanba tinan 80 ona, avo iha tan tempu hodi halo sidade Díli nabilan? Laiha ona, halo agora antes avo uza ai-tonka ne’e logika ida”.Sublinha Eis PM Taur Matan Ruak
Nia argumenta, “Se ema foinsa’e nia la ansi no hili dalan progresivu, tanba nia haree nia tinan sei bele aumenta tinan sanulu (10), maibe avo labele ona tenke hili radikal hodi sobu”.
Eis Prezidente Repúblika Taur Matan Ruak
Asaun eviksaun ne’e kruel no dezumanu tanba destroi populasaun nia investimentu. Nia atu halo uma ida presiza tinan hira mak foin hotu, destroi mos populasaun nia rendimentu lor-loron no esperansa ba futuru, sobu investimentu, rendimentu, planu ba oin.
“Avo uza filozofia ida uluk ami uza iha ai-laran ‘sakrifika ema uituan hodi defende interese ema barak nian’, avo uza modelu ida ne’e hodi sakrifika povu ne’ebe hela iha mota no estrada ninin atu halo sidade ne’e sai nabilan”.Taur akresenta
Entretantu, governu liu hosi SEATOU sei kontinua halo alargamentu estrada, hasai komunidade ne’ebe hela iha espasu públiku, fatin risku liliu mota ninin durante mandatu.
Fo Hanoin fali katak despezu administrativu ne’ebe halo hasoru komunidade sira iha Fomento I, Fomentu II no Bebonuk, oras ne’e sira balun iha ona munisipiu no hela ona iha fatin seluk tanba governu fasilita sira ho transporte maibe seidauk hetan indemnizasaun.
Tuir planu, governu sei kontinua halo alargamentu estrada públiku husi Kuluhun ba Bekora to’o Munisipiu Manatutu hahú iha loron 9 fulan Fevereiru 2025, la to’o deit iha ne’e governu mós sei kontinua servisu makaas hosi hadia no organiza sidade Dili sai moos no dezenvolvidu.
Jornalista : Marciana da Conceição
