Telkomcel Kontribui Vizita Papa Francisco Ho Susesu ! Apoia Rede & SIM 3.100 Ho Gratuita

Imajem :Chief Ezecutive Officer (CEO) Telkomcel Benedictus Ardiyanto Pryo hala’o komunikadu imprensa iha Salaun Telkomcel Timor Plaza, 12/09/2024. Foto : Ermelinda Soares

SAPNewsTL, Díli – Operador Telekomunikasaun Telkomcel sente onradu kontribui no partisipa iha vizita Sua Santidade Papa Francisco mai Timor-Leste durante loron tolu ho susesu.

Iha komunikadu imprensa, Chief Ezecutive Officer (CEO) Telkomcel Benedictus Ardiyanto Pryo hateten Telkomcel sente gratitude envolve iha preparasaun no kontribui ba vizita Papa Francisco mai Timor-Leste durante loron tolu.

“Telkomcel laiha duvida hodi fó apoiu ba komunidade iha Timor-Leste, sente onradu bele envolve iha preparasaun ba vizita Sua Santidade, Papa Francisco to’o mai la’ós de’it eventu signifikativu ida ba Timor-Leste maibé mós okaziaun importante ida ba komunidade katólika globál”.

CEO Telkomcel ne’e konsidera vizitasaun Papa Francisco ho objetivu atu promove damen, unidade, refleksaun fiar no hametin relasaun espirituál no kulturál ho komunidade katólika mundiál.

“Ita-nia fiar sai kultura, lema ofisiál vizita nian, sai hanesan “ezortasaun no enkorajamentu atu moris fiar iha armonia ho kultura, tuir tradisaun Timoroan sira nian, vizita ne’ebé ho objetivu atu promove dame, unidade, no reflesaun espirituál, hametin Timor-Leste nia ligasaun kulturál no espirituál ho komunidade katólika mundiál”.

Papa Francisco nia vizita, Telkomcel kontinua nia apoiu hodi fornese asisténsia téknika iha terrenu, habelar kobertura rede nian, no oferese WiFi gratuitu iha fatin xave sira.

“Telkomcel fasilita ona kanál komunikasaun no transporte ba reprezentante mídia ofisiál sira, hodi garante kobertura ne’ebé la’o ho di’ak no efetivu ba eventu istóriku ne’e. Telkomcel mos suporta Comissão Nacional Juventude Catolica Timor Leste no Conferencia Episcopal Timorense durante Papa Francisco vizita”. Nia sublinha

Durante vizita Santu Padre, Telkomcel estabelese ona sentru atendimentu ba kliente tolu iha fatin krusiál sira hanesan Basecamp Atauro-Oecusse (Tasi Tolu), Basecamp NTT (Tasi Tolu), no Hilton Hotel. Sentru sira-ne’e tau iha fatin estratéjiku hodi oferese asesu fásil ba servisu sira Telkomcel nian ba turista sira, mídia, no kliente sira, ne’ebé reflete empreza nia dedikasaun hodi fornese apoiu no konetividade esepsionál.

“Telkomcel halo kolaborasaun ho Comissão Nacional Juventude Catolica Timor Leste (CNJCTL) no Conferencia Episcopal Timorense (CET), distribui ona kartaun SIM gratuita hamutuk 3.000 ba juventude sira ne’ebé tuir eventu iha CCD, no SIM 100 ba média sira hosi internasional, Kartaun SIM sira-ne’e fornese Sms, xamada sira, no asesu internet gratuitu durante eventu”. Nia informa

“Ami nia apoiu abranje mobilizasaun husi Papa Francisco nia tripulasaun no ofisiál sira hotu parseiru mídia sira hodi garante kobertura ne’ebé efetivu no la interompe ba eventu istóriku ne’e. Telkomcel prova ona katak bele halo konetividade ne’ebé la interompe durante eventu ida-ne’e”.

Telkomcel hala’o atualizasaun ne’ebé signifikativu hodi apoia vizita Amu-Papa Francisco ba Eskola Irmán Alma, Katedrál, Santa Misa iha Tasi Tolu, no Enkontru Foin-sa’e sira iha CCD. Antisipa partisipante liu 700,000, Telkomcel habelar lalais nia rede hodi konstrui infraestrutura B2S foun 9, estasaun IMacro 11, massive-mimo 2 no koloka hotspot WiFi ho velosidade aas gratuita 26 iha fatin xave sira.

Iha mós asesu internet gratuitu durante eventu Alma Sister no Katedrál. Abordajen proativu ida-ne’e garante katak momentu hotu-hotu hosi eventu dala ida iha moris ida-ne’e iha ligasaun, lahó problema, no fahe hosi ema hotu, hodi subliña Telkomcel nia kompromisu kle’an atu hasa’e esperiénsia komunidade nian durante okaziaun importante ida-ne’e.

Garante konektividade konfiavel, Telkomcel konsege asegura apoiu backup liña internet liuhosi kontratu ho MTC, ANC, no TIC Timor I.P Agency. Parseria ida-ne’e destaka konfiansa ne’ebé tau iha Telkomcel nia kapasidade ne’ebé komprovadu no reputasaun sólidu nu’udar parseiru estratéjiku. Apoiu husi MTC, ANC, no TIC refleta Telkomcel nia dedikasaun hodi presta servisu esepsionál no fó prioridade ba unidade no selebrasaun ne’ebé Papa Francisco nia vizita reprezenta.

Benedictus Ardiyanto agradese ba konfiansa ne’ebé fo ba Telkomcel hodi kontribui ba eventu istóriku Timor-Leste halo iha komunidade internasional nia matan.

“Ami agradese ba konfiansa ne’ebé tau mai ami husi governu no ami nia parseiru sira, MTC no TIC. Agradese ba oportunidade ida ne’e hodi serbí no suporta okaziaun istóriku ida ne’e ho exelénsia” dehan Benedictus Ardi, CEO Telkomcel.

Enkuantu, Telkomcel mak koñesidu ho naran Telin Timor-Leste, hanesan fornesedór telekomunikasaun prinsipál ida iha Timor-Leste ne’ebé dedikadu atu fornese konetividade no solusaun dijitál sira ba ema ida-idak no empreza sira iha nasaun tomak.

Telkomcel iha kompromisu atu halo impaktu sosiál signifikativu liuhosi ninia inisiativa ne’ebé subliña ninia dedikasaun atu hasa’e moris-di’ak komunidade timoroan nian, liu hosi halo ponte ba konetividade no haburas envolvimentu komunidade nian, Telkomcel kontinua hametin ninia knaar hanesan parseiru vital ida iha Timor-Leste nia dezenvolvimentu no kreximentu.

Jornalista : Ermelinda Soares & Antonino Dulçio