TIC Timor Transmite Sistema Identidade Uniku Ba UNDIL

SAPNewsTL,Dili: Tecnologia da Informação e Comunicação (TIC Timor) realiza semináriu ho tema “ Workshop Sosializasaun Programa ID Úniku ba Funsionáriu, Dosente no Estudante UNDIL, Tuir Direktor Ezekutivu TIC Timor Roberto Caetano de Sousa Vicente katak semináriu ne’e realiza atu fo sosializasaun ba kona-ba programa identidade úniku atu sira bele hatene no bele fahe fali ba ema seluk.

“Objektivu seminariu ohin ne’e hanesan momentu ida atu sosializasaun partikularmente ba iha programa Identidade Ùniku no parte husi komponente hirak ne’e atu sira bele partilla fali informasaun ba ema no  ema ne’ebé besik, ba nia uma laran rasik”. Dehan Direktor Ezekutivu TIC Timor Roberto Caetano de Sousa Vicente iha Kampus  UNDIL, Sexta-Feira,9/09/2022.

Direktor ne’e akresenta sistema ne’ebe mak la’o hanesan Ministeriu Justisa nian ne’e sira mak trata kona-ba sira nia sertidaun no sira sei la’o ho sira nia kartaun BI no kartaun eleitoral no seluk tan

“Sistema ùniku ne’e rejistu ba ema ne’e bazeia ba informasaun ne’ebé mak eziste kona-ba ema rasik ne’ebé mak durante ne’e ita la sentraliza iha fatin ne’e no prosesu  rejistasaun ba ita nia sidadaun hirak ne’e, ita transfer dadus hirak ne’e mai iha ita nia sistema reprozitoriu data base sentral nian no ida ne’e ezisti iha fatin ida de’it laiha notifikasaun iha fatin seluk maibé iha liñas Ministeriais sira seluk sei kria mos koluna ida ne’ebé mak iha referensia ba sistema uniku nian”. Tenik Direktor Ezekutivu

Nia hatutan, tenke garante katak Sistema ne’e seguru no la duplika ID ida ba ID seluk  no ida ne’e tenke nain rejistu rasik tanba fo risku.

“Bainhira dezenvolve ona sistema ne’e ita tenke garantia sistema ne’e seguru duni no ema labele duplika ema nia ID ida ba ID seluk no labele uza ema nia dadus sira ne’e ba nia komersializasaun atu asegura katak sistema nia seguru ne’e iha mekanismu ne’ebé mak ita dezenvolve ona no ita haree katak sistema ne’ebé mak ita  implementa rejista ho nia liman rasik la’os uza ema seluk nian tanba risku sempre iha sistema ne’ebé mak seguru ba sira”. Nia hatete

Iha fatin hanesan Reitor III Hugo Lorenco fundamenta tenke haree ba nasaun avansadu ne’ebé utiliza Sistema ne’e hodi halo mudansa teknolojia iha Timor.

“Programa ida ne’e los maibé tenke iha referensia no iha paizes avansadu hanesan Japaun, Europa, Ámérika no iha rejiaun ne’ebe mak avansadu ne’e tama ona iha informasaun no adaptasaun ho teknolojia ne’ebé  lais tebes, ita Timor sempre adapta ho evolusaun teknolojia ne’ebé mak la’o lais no ita Timor tarde tebes no ba futuru ida ne’e di’ak tebes atu identifika identidade autentika no orijen husi ema ida bele mos kontrola ho ita nia ID sira seluk”. Nia salienta

Reitor III ne’e realsa, programa ida ne’e di’ak tebes nune’e kopera no apoiu atu halo mos sosializasaun ba sosiedade atu hotu-hotu bele uza programa ne’e.

“Ha’u hanoin ida ne’e di’ak teb-tebes ba ita, previzaun ba futuru mesmu ita nia governo seda’uk iha dadus ida adekuadu, hanesan ami instituisaun akademika kopera, atu apoiu governu liu husi sosializasaun, iha ita nia sosiedade no estudante sira kona-ba importansia servisu ida ne’e no mos bele sai mekanismu ida atu fo konsolizasaun ba ita nia komunidade tomak”. Nia hakotu

Jornalista : Aquelinda Mangalhaes & Esmeralda da Silva

Editor : Luis Pailofo