Imajem : Edifisiu Eskola EBF Aelafa ne’ebe rai-taka iha tinan 2022, Daudere,10/06/2024. Foto : Denilia Soares
SAPNewsTL, Lautem: Edifisiu Eskola Ensinu Baziku Filial (EBF) Aelafa Suku Daudere Postu Administrativu Lautem to’o oras ne’e seida’uk halo rehabilitasaun ka konstrusaun tanba seidauk define rai ne’ebe seguru.
Iha entrevista ho Diretor Servisu Edukasaun Munisipiu Lautem Anibal Fernandes haktuir Ensinu Baziku Filial Aelafa ne’e seidauk halo konstrusaun foun tanba seidauk define rai.
“EBF Aelafa los duni nia edifisiu ne’e foin konstrui husi NGO FUNDAMOR apoiu husi Embaxada Japão, edifisiu refere hetan dezastre naturais rai monu hanehan depois eskola ne’e to’o ohin loron seidauk rehabilita ka halo konstrusaun tanba rai”. Dehan Diretor Servisu Edukasaun Munisipiu Lautem Anibal Fernandes iha Edifisiu ESG Fernando Lasama Luro, 10/06/2024
Imajem : Diretor Servisu Edukasaun Munisipiu Lautem Anibal Fernandes iha Edifisiu ESG Fernando Lasama Luro, 10/06/2024
Diretor ne’e informa, nia parte hato’o ona ba Xefe Suku hodi husu komunidade atu oferese rai ne’ebe seguru hodi bele halo fali konstrusaun foun.
“Husu ona rai ba Xefe Suku oinsa mak bele husu rai husi komunidade atu ita bele hari’i eskola foun, Embaxada Japão mos ezije ida ne’e dala hira kedas sira ezije sira oferese duni rai maibe iha mota ninin ida ne’e risku bo’ot tan ne’e ita seidauk hetan resposta husi komunidade liu-liu iha Xefe do Suku atu oferese rai ida ne’ebe seguru atu nune’e ita bele hari’i fali eskola ne’e iha Aelafa”. Tenik Diretor Anibal
Imajem : Xefe Suku Daudere Azito Boavida
Xefe Suku Daudere Azitu Boavida informa hanesan autoriedade sei halo enkontru komunitariu ho inan aman komunidade atu oferese rai, nune’e bele hari’i fali eskola foun hodi oan sira bele asesu.
“Nu’udár Autoridade iha mos planu kona-ba EBF 1, 2 Siklu Aelafa ida ne’e autoriedade labele abandonadu tanba komunidade maioria mota sorin mesak labarik kiik deit labele mai eskola ho distansia ne’ebe dook tanba ne’e mak autoriedade lokal iha ona planu para konvoka enkontru ho komunidade relasiona ho fatin para bele halo konstrusaun eskola foun, nune’e oan sira bele asesu edukasaun ho distansia ne’ebe besik”. Xefe Suku afirma
Imajem : Alunus EBF Aelafa uza aula provizóriu hodi hala’o prosesu ensinu aprendijajem
Koordenador EBF Aelafa Henrique Marques hateten agora dadauk sira uza sala provizóriu maibe la seguru no kona ba edifisiu ne’e sira hato’o ona maibe seidauk iha resposta.
“Rai monu ne’ebe afeta eskola EBF Nu. 1 no 2 Aelafa, ami enkamina ona ba Ministeiru Edukasaun maibe to’o ohin loron laiha rezultadu, ne’ebe tuir ha’u nia hanoin ne’e alunus sira ne’ebe mak pertense iha eskola refere ohin loron uza edifisiu provizoriu ne’e ladun favoravel ba ita nia estudante sira tamba hetan rai rahun iha tempu bai loron no iha tempu udan hetan tahu iha aula laran”. Katak Henrique
Entretantu, EBF Aelafa ne’e hari’i husi NGO FUNDAMOR no hetan apoiu finansas husi Embaxada Japão ne’ebe konstrui iha 2021 no afeta dezastre iha 2022
Enkuantu, Ensinu Baziku Filial total estudante hamutuk ualunulu resin neen ne’ebe kompostu husi feto nain haatnulu resin ida (41) no mane hamutuk (45) ne’ebe hanorin husi manorin sira hamutuk nain lima ho feto nain rua no mane nain tolu
Jornalista: Julmira Pires & Denilia Soares