Tinan 6 Uza Sala Aula Provizóriu ! Eskola Lasama Luro Hetan Edifisiu Foun
SAPNewsTL, Lautem: Koordenador Eskola Sekundaria Filial Fernando Lasama Luro Adolfo Paulo Hornay hateten tinan barak la iha sala de aula maibe ohin konsege hetan ona edifisiu foun rua ho sala de aula neen tanba ne’e nia agradese ba guvernu.
Tuir Koordenador Ensino Secundariu Filial Fernando Lasama Luro Adolfo Paulo Hornay hateten nia sente orgullu no agradese tanba durante tinan barak la iha sala de aula maibe sira bele hetan ona edifisiu foun.
“Ha’u sente orgullu no agradese bo’ot ba Ministerio Edukasaun ne’ebe mak bele oferese konstrusaun edifisiu unidade rua, ami sente kontente tanba la iha edifisiu durante tinan barak maibe ohin bele inaugura edifisiu foun ida ne’e”. Dehan Koordenador Ensinu Sekundaria Filial Fernando Lasama Luro Adolfo Paulo Hornay iha nia knaar fatin, 12/01/2023
Koordenador Adolfo akresenta nia garante maske edifisiu foun ne’e seidauk iha eskritoriu maibe sei kontrola no jere atu ensinu aprendizajen lao ho di’ak.
“Ha’u garante nafatin tanba sala lima ne’e ami sei utiliza ba aprendizajen depois sala ida ami sei uza ba eskritoriu provizoriu agora dadauk trasa ona orariu ba turnu rua ba parte dader no loraik ami garante katak prosesu ne’e sei la’o ho susesu”. Tenik Koordenador
Koordenador Ensinu Sekundariu Filial Fernando Lasama Luro ne’e mos husu ba estudante sira atu asegura edifisiu foun ne’e no utiliza ho kuidadu.
“Nu’udar Koordenador Ensinu sekundariu Filial Fernando Lasama Luro Sentru maka Ensinu Secundaria Geral Nino Konis Santana Lospalos aviza ba estudante sira hotu-hotu para utiliza edifisiu foun rua ne’e hanesan mos ita nia an rasik, se ita nia an ne’e labele halo kanek favor ida edifisiu sala neen ne’e mos labele halo kanek labele pinta tun sa’e, labele riska, labele hakerek letra sira ne’ebe tendensia ba konflitu nian, husu estudante sira hatudu ezemplu ba edukasaun Munisipiu Lautem no ba Territoriu katak ita mos bele katak ita iha maturidade, etika no moral”. Koordenador Adolfo hameno
Koordenador ne’e haklean “edifisiu foin ne’e ami presiza tebes tanba durante ne’e ami laiha sala de aula ne’e propriu ami nian ami sei haree didiak edifisiu ne’e”.
“Edifisiu foun unidade rua ne’ebe komtempla aula tolu entaun hamutuk aula neen, ne’e pertense ba Escola Secundaria Filial Fernando Lasama Luro, propriu ami nian rasik entaun presiza haree didi’ak aula neen ida ne’e tanba durante ne’e ami la iha sala de aula nune’e presiza tebes”. Nia fundamenta
Nune’e mos reprezentante estudante Eskola Sekundaria Filial Fernando Lasama Luro Natalino Soares agradese ba governu tanba sira bele hetan ona edifisiu foun maske durante uza deit aula provizoriu ne’ebe didin ho kalen no ai sira komesa dodok ona tanba uza to’o ona tinan neen.
“Hanesan estudante ha’u agradese tanba ami bele hetan ona edifisiu foun ho unidade rua, durante ne’e ami uza deit aula provizoriu maibe ohin iha ona edifisiu foun ami agradese”. Natalino
Entretantu, Eskola Sekundaria Filial Fernando Lasama Luro ne’e hahu hari’i Profesor sira hamtuk ho estudante konstrui rasik sala provizoriu tolu ne’e uza to’o ohin loron inklui mos utiliza sala aula balun husi EBC Luro.
Jornalista: Aleixo Ximenes