Traballador 1 Hakotu Iis Iha Korea Sul ! Jose Husu Timoroan Kuida An
Imajem : Matebian Jose António Rebelo da Silva iha Corea Sul
SAPNewsTL : Traballador Timoroan Jose António Rebelo da Silva hakotu iis iha Daejon-Jeon Hospital tanba hetan asidente iha loron 01 Fulan Setembru 2024. Asistente Adidu José Sebastião Coli Soares informa sei lori fila mai Timor-Leste.
Iha entrevista liu hosi via online ho Asistente Adidu Timor-Leste iha Corea Sul José Sebastião Coli Soares haktuir parte Adidu, Embaixador no SEFOPE halo ona komunikasaun ba malu hodi translada mai iha Timor-Leste.
“Hafoin nia hetan asidente iha loron 01 Setembru 2024, halo tratamentu iha ospitál maibe la konsege salva nia vida iha loron 18 Janeiru 2025, oras ne’e ami trata ona ninia dokumentu oinsa bele lori fila nia mate isin ba Timor-Leste”. Tenik Asistente Adidu Timor-Leste iha Corea Sul José Sebastião Coli Soares ba SAPNews iha Corea Sul, 21/01/2025
Asistente Adidu José Sebastião Coli hatutan parte adidu sei prosesa hela dokumentu no buka aviaun ne’ebé disponivel hodi tula mate isin fila mai Timor-Leste. Nune’e nia parte husu família sira hodi koragem nafatin hasoru situasaun difisil ne’e.
“Orseik ami vizita ospitál no ko’alia ho diretor katak ami agora prosesu la’o hela, ami sei esforsu, wainhira ami hetan ona dalan hodi determina ona data no oras maka ami mai lori mate isin ba Timor-Leste, agora ita seidauk iha data fixu, maibé prosesu normal sei la’o fulan ida, nune’e ha’u husu ba família sira hodi koragem nafatin”.Nia informa
Matebian Jose Antonio Rebelo Da Silva moris Becora,Dili, loron 17 fulan Jullu tinan 1995, matebian hahú tama ba servisu iha Sul Korea iha loron 8 fulan Janeiru tinan 2019 liu hosi Sekretaria Estadu Formasaun Profisional no Empregu (SEFOPE).
Matebian hetan asidente ka soke poste eletrisidade ho motor iha loron 01 fulan Setembru 2024 no hakotu iis iha loron 18 Janeiru 2025, oras ne’e mate-isin sei iha Daejon-Jeon Hospitál.
Imajem : Assistente Adidu Timor-Leste iha Corea Sul Jose Sebastião Coli Soares
Eis Prezidente Assosiasaun Uniaun Traballador TL iha Korea Sul ne’e dehan, traballador Timoroan ne’ebé servisu iha Korea Sul hamutuk rihun liman resin, entre sira balun iha sistema laran no balun ses an hosi sistema, tanba ne’e nia husu ba timoroan sira hodi kumpri lei traballador.
“Servisu kuida an, haree malu didiak, kria paz no sente katak ita Timoroan ida deit, ita diferensa iha Timor-Leste maibe ita mai Korea Sul ho Bandeira ida deit, tau aas interese nasaun nian, kria unidade, estabilidade, sai maun alin no familia ida, labele ses hosi sistema, karik hasoru problema bele hato’o no labele kontra lei traballador, labele sai barukten iha ne’e”. Nia sublinha
“Mai servisu tenki lori osan dezenvolve ekonomia família nian, rai osan fila ba Timor hodi kria fali servisu, mai tenki sai susesu no fila ho bukae ruma, labele mai foto deit iha aeroportu maibe la lori fila buat ida”. Nia aprofunda
Jornalista : Dircia Baptista Belo