Traballador Timoroan Hetan Ameasa Husi Empregador Iha Austrália
SAPNewsTL, Australia : Traballador Timoroan ne’ebe hala’o servisu ho empregador ida iha Northern Territory Darwin hetan diskriminasaun no hetan tratamentu ne’ebe la justu.
Traballador Timoroan Carlos Gusmão informa ba SAPNews liu husi via telefone haktuir, nia parte sente diskriminadu tanba hetan tratamentu ne’ebe la justu, entre nia ho nia maluk sira seluk iha servisu fatin.
“Problema ne’ebé ami hasoru ne’e maka, kompaña trata ami la justu, ami iha ne’e staff disability Support worker ne’e lubuk ida, no staff hirak ne’e mai husi nasaun ne’ebe la hanesan maibé ami staff Timor oan kompaña trata la justu. Iha tinan kotuk ami nain 9 hahu tuir treinamentu konaba Certificate III ba Disabilities no entre ami nain 9 ne’e nain tolu seluk husi Africa, Australia no Samoa”.
“Maibé infelizmente ami nain lima husi Timor la konsege kontinua tanba sirkunstansia balun ne’ebé akontese, no kompaña rasik deside hodi hapara ami nia kursu no nain 3 seluk kontinua, maibé durante kursu online ami staff timoroan nain lima ne’e mak ativu sira nain tolu mak ohin temi ne’e nunka partisipa aula online. ida ne’e diskriminasaun boot ne’ebe ami hasoru”. Tenik Traballador Timoroan Carlos Gusmão ba liu via telefone ba SAPNews iha Darwin, 17/02/2024
Carlos Gusmão hatutan, wainhira sira halo sala kiik oan ruma, kompanha sempre fo ameasa hapara ninia kontratu, situasaun ne’e halo sira sente la seguru iha servisu fatin.
“Bainhira ami iha erru ki’ik oan ruma, kompaña ameasa fo kedan Warning Letter atu hapara kontratu, ida ne’e halo ami senti servisu iha presaun nia laran maibé senior sira no staff seluk ne’ebe servisu kleur iha kompaña ne’e mak komete kazu ruma, kompaña nunka halo asaun ruma hasoru sira, la iha desijaun ruma ba sira.” Nia dehan
Traballador Timoroan ne’e dehan, relasiona ho problema ne’ebe sira hasoru, nia parte informa ona ba adidu iha Austrália maibe infelizmente seidauk hetan resposta husi adidu sira.
“Durante ami servisu iha ne’e, ha’u ho kolega feto ida besik tinan ida ona, sira seluk balun fulan 6 no balun fulan 3, nunka provide ai moruk sala ba kliente, nunka missed cliente nia ai moruk, nunka halo asaun brutalizmu hasoru kliente. Tamba ne’e maka fulan kotuk ami envia EMAIL ba Adidu sira atu vizita ami iha Darwin Northern Territory hodi hato’o problema sira ne’e maibé infelizmente to’o agora sira la mosu mai”.
Traballador ne’e mos husu ba Sekretaria Estadu Formasaun Profisional no Empregu (SEFOPE) hodi buka dalan, nune’e sira bele kontinua hala’o servisu ho kompanha seluk tanba sente la konfortavel servisu iha kompanha refere.
“Ami husu, karik SEFOPE buka dalan bele kontrata ami ho kompaña seluk hodi kontinua servisu nu’udar disability support worker iha Australia”. Nia husu
Enkuantu, hafoin notisia ne’e tun, SAPNews seidauk halo komfirmasaun ho parte adidu Timoroan iha Austrália no SEFOPE tanba sei okupadu ho servisu seluk.
Jornalista : Marcela Mesquita Lemos