Udan-Boot ! Rai-Lakan Tarutu Hamate Joel Iha Aileu

Imajem : Komunidade Hoholau haree Joel de Araújo ne’ebé hetan dezastre iha Aileu Villa,14/01/2025. Foto : Custódio de Araujo

SAPNewsTL, Aileu : Relasiona ho udan boot ne’ebé akontese iha Suku Hoholau, Aileu Villa rezulta labarik Joel de Araujo ho idade 14 lakon vida.

Iha entrevista ho nia maun Custódio de Araújo haktuir udan boot ne’ebé mosu iha postu administrativu Aileu Villa, Munisípiu Aileu rezulta Joel de Araújo mate fatin.

“Ohin Udan boot ne’e mosu iha tuku 1 meiudia, akontese rai-lakan tarutu iha tuku 2 liu, derepente ami rona husi maun Mariano da Silva katak Joel hetan dezastre, entaun nia mai hateten ba ha’u, nune’e ha’u ba haree maibe nia laiha ona iis”. Informa Custódio de Araújo ba SAP News liu hosi vía whatsapp iha Aileu, 14/01/2025

Hafoin dezastre ne’e akontese, iha doutor ida mak ba halo chek up ba alin ne’e maibe infelizmente Joel da Silva laiha ona iis.

“Doutor ida mak mai haree maibe labarik laiha ona iis, nune’e ami lori ona nia ba iha nia residênsia”. Nia dehan

Matebian Joel de Araújo halo ona tinan sanulu resin-haat (14), eskola iha Aileu Villa tur iha banku primáriu ho klasse 4 anu.

Dezastre ne’e akontese ohin loron 14 Fulan Janeiro 2025 iha Aldeia Maururia, Suku Hoholau, postu administrativu Aileu Villa, Munisípiu Aileu.

Jornalista : Marciana da Conceição