Udan Durante Oras 4 ! Rezulta Inundasaun & Bee Tama Uma Komunidade
SAPNewsTL, Dili : Ohin mais ou menuz tuku 1 meiudia, akontese udan boot durante oras haat iha kapital Dili, durante udan mota invade estrada no bee tama komunidade sira nia uma tanba mosu inundasaun.
Iha intervista ho sidadaun Leonardo Machado informa, relasiona ho udan ne’ebe mosu ohin iha kapital Dili liliu iha Postu Administrativu Dom Aleixo, iha area suku Fatuhada mosu inundasaun rezulta bee tama ba ema nia uman no mota tuir fali estrada.
“Udan ne’e mosu durante oras haat resin ona, durante udan rezulta inundasaun tanba volume bee boot tebes liu drainagem ne’ebe iha, rezulta bee tama komunidade sira nia uma no halai tuir fali estrada”. Informa Sidadaun Leonardo Machado ba SAPNewsTL iha Fatuhada, 09/01/2024
Nia hatutan, se udan ne’e kontinua maka mota bele estraga hotu komunidade nia uma no sasan sira tanba drainagem klot la responde ba bee ho volume boot hanesan daudaun akontese.
“Se udan kontinua nune’e, maka mota sei sobu komunidade sira uma hela fatin”. Nia sublinha
Entretantu, situasaun ne’ebe hanesan akontese mos iha area Manleuana, Kaikoli, Markoni, Lurumata no fatin sira seluk tan.
Jornalista : Marcela Mesquita Lemos