Ukun Ne’ebe Haree De’it Kor Partidu, Ne’e Pekadu Boot

SAPNewsTL, Dili : Administrador Parokia Sagradu Korasaun de Jesus (SAKROJES) Bekora, Pe. Bernardo Paiva konsidera ukun ne’ebe haree deit nia kor partidu ne’e pekadu boot tanba la konsege akumula ema matenek na’in sira hotu hodi servisu hamutuk.

“Estadu demokratiku, ukun ne’e sempre mai husi partidu ne’ebe konkore eleisaun, se mak manan nia mak ukun, toman aat ida mak ida mai ukun halo ninian, ida mai fali halo ninian, wainhira ema matenek iha laran, tanba nia laos partidu ida hasai tiha, ita la servisu hamutuk entre matenek no matenek, la haree ba partidu A ka B, oinsa mak lori ministeriu ida servi povu ho lolos”. Tenik Pe. Bermardo Paiva ba SAPNews iha Igreja SAKROJES Bekora, 24/03/2024

Pe. Bernardo Paiva dehan, atu ukun nasaun ida ho diak no lori desenvolvimentu nasaun ba oin presiza ema hotu servisu hamutuk ho sentidu estadu, poder laos absolutamente, poder presiza apoia malu, tanba ema ida mesak labele ba oin.

“Partidu ida mai hasai hotu kedas ema seluk ne’ebe laos partidu hanesan, lolos ita presiza servisu hamutuk, poder sim, maibe poder laos absolutamente, poder ne’e interdependensia ba malu, presiza kolabora ba malu, ita mesak deit labele, ita presiza sentidu estadu”.

Administrador Parokia SAKROJES ne’e aprofunda, wainhira ukun haree ba kor partidu deit ne’e hatudu pekadu boot no hatudu presedente ladiak ba jerasaun foun sira ne’ebe sei ukun nasaun iha loron aban bainrua.

“Se ukun haree partidu deit, la halibur ema matenek hodi servisu hamutuk, ne’e pekadu boot no hatudu presedente ladiak ba jerasaun foun sira”. Pe. Bernardo Paiva hateten.

Lider Parokia Bekora ne’e husu ukun na’in sira hodi hatudu prestasaun no lolo liman ba malu hodi servisu hamutuk ba moris diak no dezenvolve nasaun ne’e ho diak ba futuru.

Jornalista: Ekipa Kobertura