Universidade Tolu Iha Cambodia Atribui Títulu Doutor Onoráriu Ba PR Horta
Imajen Prezidente Republika, José Ramos-Horta, kinta-feira ne’e simu doutoramentu onoráriu husi universidade tolu iha Kambodia, 21/10/2022
SAPNewsTL(Cambodia) : Prezidente Republika, José Ramos-Horta, kinta-feira ne’e simu doutoramentu onoráriu husi universidade tolu iha Kambodia, onoráriu ne’e nu’udar rekuiñesimentu ba kapasidade no kontribuisaun ba komunidade no mundu iha àrea jestaun konflitu, lideransa no seluk tan.
Universidade tolu ne’e mak hanesan, BELTEI International University, Kambodia Universidade no Paragon International University.
“Sira fo doutoramentu honoris kauza ba ha’u, ne’e hanesan rekuiñesimentu ba ha’u-nia kontribuisaun iha area oi-oin iha relasoens internsionais, lideransa, jestun konflitu no seluk tan. Doutor honoris kauza ne’e hanesan diploma ida para rekuiñese ema ruma la’os estudante universidade ne’e, maibé nia kontribuisaun iha komunidade ka iha nasaun iha mundu hanesan kualifika nia atu simu “doutor honoris causa”. hateten Xefe Estadu José Ramos-Horta hafoin simu títlu doutór honoris kauza, Kambodia, 21 outubru 2022
Tuir Prezidente Repúblika, titlu ne’e kontribui mós ba fortalesimentu relasaun entre universidade sira ho personalidade sira iha instituisaun superior sira iha Kambódia.
“Ne’e kuaze universidade hotu-hotu iha mundu halo ida-ne’e, liu-liu para hametin relasaun entre universidade ho elementu ka personalidade ne’ebe sira fó grau akadémiku ida-ne’e, iha latin bolu “doutór Honoris Causa” iha tradusaun fasil maka doutoramentu onoráriu,” fundamenta Prezidente Horta.
Iha serimónia ne’ebé partisipa husi universitáriu rihun ida resin, Prezidente Repúblika foka ba esperiénsia Timor-Leste, Indonézia no Kambódia iha kontestu rekonsiliasaun.
Entertantu, Partisipa iha serimonia atribuisaun doutoramentu onoráriu ba Prezidente Republika, José Ramos-Horta mak Ministru Edukasaun, Juventude no Desportu Kambodia, Hangchuon Naron, membru governu seluk no mós delegasaun husi Timor-Leste.
Jornalista : Vinsensius Saldanha Morais Araujo