UNTL : Dosente FAGRI La Fo Aula, Estudante Husu Deskulpa ! Aula La’o Normal Hikas

SAPNewsTL, Dili : Ligadu ho deklarasaun estudante Fakuldade Agrikultura (FAGRI) ne’ebé hala’o ona iha semana kotuk hodi kontra aktu dosente to’o hasai liafuan malandru no estúpidu, Ohin assosiasaun estudante FAGRI husu ona deskulpa no klarifika katak liafuan rua refere la dedika ba dosente hot-hotu.

Associação Acadêmica Estudantil da Faculdade de Agricultura (AAE-FAGRI) hakarak esklarese ba korpu Dosente sira iha FAGRI ne’ebé senti ofendidu ho liafuan “Maladru” hodi prejudika ba dosente lakohi fo aula ba estudante sira, nune’e AAE husu deskulpa ba dosente hot-hotu iha FAGRI.

“AAE-FAGRI hakarak atu esklarese ba públiku katak “AAE-FAGRI sei la tolera Dosente Malandru iha FAGRI” liafuan ida-ne’e iha intensaun atu fo atensaun ba dosente sira hotu iha Faculdade de Agricultura katak labele kria ka halo tan sei la tolera ba aktus hanesan problema ne’ebé akontese iha Departamento Pescas Marmalandru”.

“Laloos, refere ba karisimus Dosente hotu-hotu ne’ebé iha FAGRI. Hare’e ba públiku ne’ebé balun ladun satisfas, inklui karisimus Dosente sira seluk neʼebé iha FAGRI, tanba konsidera AAE jeneraliza liafuan ba dosente hotu-hotu no liafuan ne’e ofende tebes dosente sira seluk) maka AAE-FAGRI hato’o deskulpa ba Dosente sira seluk iha FAGRI ne’ebé sente ofendidu ba liafuan refere”.Tenik Arlindo Rodrigues liu hosi komunikadu imprensa iha Kampus Sentral UNTL, 14/10/2024

Lider assosiasaun estudante ne’e garante katak dosente sira bele fo perdaun ba lia hirak ne’ebé fo sai ona ba públiku iha semana kotuk.

“Espera katak, ho AAE-FAGRI nia rekoñese an ne’e, bele hetan perdaun hosi karisimus Dosente sira seluk ne’ebé iha FAGRI, hodi kontinua hala’o atividade loron-loron nian iha kampus lao normal hanesan baibain”.

Antes ne’e, Fakuldade Agrikultura  nia dosen sira deside hapara aula temporariamente ba estudante sira tanba la simu komunikadu imprensa ne’ebé fo sai hosi estudante sira.

“Liafuan sira ne’ebé mak estudante sira ko’alia ne’e,  soke dosente hotu-hotu, Liu husi reuniaun ne’e, dosente sira deside kualkér atividade, orientasaun, ami sei hapara hotu. Kuandu estudante-sira la husu deskulpa kona ba sira ninia liafuan ne’e ” deklara Dekanu FAGRI-UNTL, Vicente  de Paulo Correia ba Jornalista sira, iha Kampus Sentrál UNTL, Sesta (11/10/2024).

Dekanu FAGRI sublinha, estudante hotu-hotu iha direitu  atu halo kritika bazeia ba problema sira ne’ebé mak estudante.

Enkuantu, ohin aula iha Fakuldade Agrikultura la’o normal hikas tanba estudante sira hato’o ona deskulpa ba dosente sira iha FAGRI. Entretantu kona ba demite dosente ne’ebé ameasa estudante seidauk iha solusaun ikus husi fakuldade no universidade.

Jornalista : Marciana da Conceição