UNTL No Familia Uatulari Rekolla Restus Mortais Saudozu Agustinho Iha Resintu FECT-Hera

SAPNewsTL, Dili: Alumni Estudante Politeknik Dili, Agustinho de Carvalho do Rosário no Estevão Pereira ne’ebé inimigu oho iha loron 20 Maiu 1999, Familia no amigu saudozu nain rua ke’e hikas ona sira nia restus mortais iha resintu Fakuldade Enjeñaria Siénsia no Teknolojia (FECT) Hera, Iha Intrevista Xefe Kaixa Laloran Timor Cipriano do Rosario Pereira hateten saudozu nain rua atu salva dokumentu Klandestinu maka inimigu hetan hodi tortura, futu sira rua hamutuk, oho no hakoi hamutuk iha kuak ida deit iha area Akanuno Hera

Tuir Cipriano, Saudozu Agustinho de Carvalho do Rosario nu’udár estudante Politeknik Negri Dili, aktivista polítika ida no nia tur iha estrutura kona ba azitasaun polítika.

“Saudozu Agustinho de Carvalho do Rosario involve duni iha kaixa Laloran Timor hanesan ativista polítika ida iha Politéknika Negri Dili iha momentu ne’ebá konsekuensia husi ninia aktividade ba rezistensia ida ne’e mak saudozu ne’e hetan torturasaun, militar Indonésia oho iha dia 20 de maio 1999”. Dehan Chefe Kaixa Laloran Timor Cipriano do Rosario Pereira ba Jornalista sira iha Resintu FECT-UNTL Hera

Nia aumenta, kaixa laloran Timor hari’i iha Politeknik ne’e tanba tuir Forsa FALINTIL haree fatin ne’e estratéjiku atu  utiliza estudante no intelektual sira para halo Klandestina no Funu hasoru militar Indonesia iha Momentu ne’eba.

“Estabelesimentu kaixa Laloran Timor iha ne’e iha politékniku ida ne’e tuir forsa  falintil ninian katak fatin ida ne’e estrategiku, fatin ida ne’e bele akumula ba intelektual timor  oan tomak ne’ebé mak eskola iha ne’e. Entaun momentu ne’ebá FALINTIL indika kedas fatin  ne’e sai hanesan fatin estrategia para utiliza estudante mahasiswa sira liliu intelektual sira para atu halo funu tanba ne’e mak saudozu Agustinho hanesan  ativista polítika iha seksaun no azitasaun propaganda iha situasaun difisil”. Tenik nia

Nia hatutan, wainhira militar Indonézia halo persegisaun ba fatin ne’e sira hotu halai namkari no dokumentus FALINTIL nian ne’ebé  rai hela depois de liu loron 10 saudozu fila fali ba kampus atu guarda dokumentus ne’ebé sira asegura mak forsa militar kaptura, tortura no oho sira rua.

“Liu tiha loron 10 sira mai fila fali iha kampus ida ne’e atu guarda dokumentus  resistensia balun ne’ebé mak sira asegura hela, entaun iha momentu ne’ebá kedas militar  kaptura halo torturasaun i oho tanba nia mos hanesan ema resistensia responsabilidade iha estrutura”.nia informa

Enkuantu, momentu ne’ebá saudoso Agustinho no Estevão inimigu kaptura sira rua hamutuk iha dia 20  kaptura no halo torturasaun iha parte kampus Politeknik Negri Dili no hakoi mak iha Akanunu.

Entretantu, Familia Saudozu nian Sr. Antonio da Silva Gomes sente triste tanba lakon nia oan mane Aswa’in  ida, maibe agradese tanba nia oan mos hola parte direita no kontribui ba rai Timor nia ukun rasik an

“Ami nia hakarak, ami nia oan mai eskola atu hetan matenek para ba futuru nasaun ninian maibé ikus mai konsekuensia funu nian mak sai hanesan ne’e maibé nu’udar hanesan familia ami triste uituan tanba ami nia oan mate, iha parte ida ami orgulhu tanba ami nia oan mate ne’e ba nasaun ida ne’e la’os tanba nia halo tun halo sa’e, depois ikus mai ema oho maibé tanba nia mos hakarak luta duni ba nasaun ida ne’e hamutuk ho ninia kolega sira”. Dehan  Antonio da Silva Gomes

Enkuantu, Kona ba trata dokumentus familia sira trata ona maibe ninia direitu seidauk simu, durante ne’e sira verifika tiha dala hira ona maibé to’o agora la hatene ninia sala no failsansu iha ne’ebe

“Matebian ne’e moris iha Uatulari, 27/05/1976, oan ba dala sia, oan husi Amelia de Carvalho no Manuel do Rosario, oan hamutuk 13 maibe agora moris hela nain lima deit no nain ualu fila inklui mos saudozu”. Nia dehan

Enkuantu, familia sei kolabora ho parte Universidade Nasional Timor-Lorosa’e hodi hatur saudozu nain rua nia monumentu iha resintu Fakuldade de Engenaria Siensia no Tekonolojia Hera, purtantu Saudozu Estevaun Pereira nia restus Mortais familia ke’e hikas ona iha tinan 2001 liu ba.

“Iha tinan 2000, familia Saudozu Estevão Pereira husi Laga sira hasai nia ruin iha fatin ida ne’e, tinan 2022 ne’e mak ami familia Saudozu husi Vikeke Uaturali mai ke’e nia restus Mortais, ami exize atu tau ninia monumentu, no ami sei lori nia Restu Mortais ba tau hamutuk ho restus mortais iha uma mahon Uatulari nian depois ami hein osoáriu ne’ebe maka atu halo iha ne’eba diak ona ami haloot dala ida”. Nia hakotu

Jornalista  : Sergio Alves da Costa

Editora      : Marzinha Patrisia Hornay