Venceslau Konsidera Estudante Aprende De’it Iha Aula La Naton
Imagem: Entrevista Venceslau dos Santos, iha salaun UCT, 02/08/2024. Foto: Marciana da Conceição
SAPNewsTL, Díli – Universidade Católica Timorense (UCT sigla Portugés) liu hosi nia Fakuldade Direitu hala’o abertura ba Hora Jurídika, objetivu husi atividade ne’e hasa’e koñesimentu estudante sira nian iha area direitu.
Iha entrevista Doutor Venceslau dos Santos hateten, programa refere hodi partilla koñesimentu no esperensia iha area direitu nian ba estudante sira, nune’e estudante sira bele iha koñesimentu klean kona-ba realidade ne’ebe akontese iha sosiedade.
“Kria programa ida ne’e hodi bele partilla koñesimentu no esperensia ne’ebe iha ligasaun ba mundu direitu liu-liu ba realidade sira ne’ebe akontese iha sosiedade, tamba estudante aprende no estuda de’it iha sala de aula, la partilla esperensia halo sira nia koñesimentu sai klot”. Tenik Doutor Venceslau dos Santos ba SAPNewsTL iha salaun UCT, (02/08/2024).
“Konferensia ne’e atu transmite esperiensia ba imi, esperiensia formal no informal ho informasaun barak ne’ebe imi seidauk hatene liu husi fora de teoria, oinsa bele halo lei ida ba kria sosiedade, bainhira iha ona lei tenke iha komitmentu no obedese”.
Professor ne’e parabeniza estudante sira hotu tamba bele organiza no partisipa iha abertura aula jurídika hodi dezenvolve sira nia kapasidade iha area judisial.
“Hau fó parabéns ba imi hotu ne’ebe ohin partisipa iha programa ne’e, espera ne’e kontinua ho tema foun no iha futuru imi nafatin entusiasmu hodi aprende ba Timor-Leste nia kualidade”. Nia subliña.
Doutor Venceslau dos Santos husu estudante sira atu estuda no esforsu makas hodi hadia sira koñesimentu kona-ba sistema judisiáriu no aplikasau lei iha Timor-Leste.
“Estudante sira tenke estuda no esfosu makaas, labele hein deit aula hotu ona, imi iha koñesimentu barak maibe imi tenke iha informasaun sira ne’ebe bele haboot no haklean kapasidade ida-idak nian”.
Professor ne’e mos dejeza susesu bo’ot ba estudante no juventude sira hodi sai sidadaun ne’ebe forte, matenek, espertu no iha responsabilidade ba setor justisa iha Timor-Leste.
“Ha’u dezeju katak iha futuru imi sai estudante ne’ebe matenek no susesu liu-liu riku iha esperensia, imi sei sai responsável iha setor justiça”.
Enkuantu, atividade refere organiza husi estudante fakuldade direitu iha ne’ebé hetan partisipasaun masimu husi profesores no estudante sira.
Jornalista: Marciana da Conceição