Vise PM Assanami Prefere Inklina Istória Passadu Iha Kurríkulu Eskolár
SAPNewsTL, Dili : Iha Âmbitu Selebrasaun Aniversáriu Centro Nacional Chega (CNC) ba dala VI, Iha Diskursu Vise-Primeiru Ministru e Ministru Coordenador dos Assuntos de Dezenvolvimento Rural (V-PM-MCADR), Mariano Assanami Sabino, husu CNC hodi kontinua prezerva memória luta passadu nian no transmite ba Joven Sira hodi aprende no sai Aswa’in foun iha Timor Leste
Vise-Primeiru Ministru no MCADR, Mariano Assanami Sabino, haktuir CNC nu’udar instituisaun ne’ebé importante ba estadu, hodi prezerva memoria luta pasadu nian ba jerasaun foun sira hodi aprende sai aswain foun iha Timor Leste
Assanami husu ba joven Sira ne’ebe involve iha variedade Organizasaun hodi respeitu malu no hari’i dame iha rai doben ida ne’e hodi Dignifika eroi rihun 300.000 ne’ebe sosa nasaun nia ukun rasik an
“Ha’u hambrik iha palku oi-oin sempre fó mensajen ba joven sira neebé inklina aan iha organizasaun oi-oin, atu kontinua respeitu malu, hamutuk hari’i paz no rekosiliasaun hodi valoriza luta eroi 300 mil pesoas ne’ebé mate ba rai ida nee,” Dehan Vise-Primeiru Ministru, Mariano Assanami Sabino liu husi nia Diskursu iha ambitu komemorasaun aniversariu CNC ba dala neen, iha Eis Komarka, Balide, Dili,17/07/2023
Governante ne’e Konta, “Iha luta pasadu ema barak sente sai vitima, hetan torturasaun ho sofrimentu oi-oin, no Timor oan sira mate liu rihun 300, situasaun nee sente todan, maibé rezulta independensia ida, ohin loron povu goza ona ninia liberdade”.Nia hatete
“Situasaun pasadu ne’e fó mensajen ba joven hotu-hotu atu banati tuir joven sira seluk ne’ebé uluk luta ba independensia, entaun joven agora tenke hambrik foti responsabilidade sai eroi foun ba dezenvolvimentu nasionál, labele sai fali obstakulu hodi impende ema seluk nia liberdade”.
Vise Primeiru Ministru ne’e afirma sei kontinua apoiu ejistensia CNC nian ba futuru, Inklui koalia ho Ministériu Edukasaun oinsá atu inklina materia Istoria pasadu nian iha kurikulum eskolár, atu nune’e Foinsa’e sira estuda hodi hametin sira nia nasionalizmu no patriotizmu sai vanguarda ba RDTL ohin no ba futuru.
Entretantu, Partisipa iha serimonia Aniversáriu CNC ne’e mak hanesan sobrevivente sira, sivíl no militares, diplomariku sira no selu-seluk tan.
Jornalista: Esmeralda da Silva