Vizita António Guterres & Papa Francisco ! Seguransa Sei Kontroladu & Organizadu
Imajem : Presidente Repúblika Jose Ramos Horta & Primeiru Ministru Kayrala Xanana Gusmão iha Palasiu Presidensial Aitarak-Laran, 25/07/2024. Foto : Media PR
SAPNewsTL, Díli – Primeiru-Ministru (PM), Kay Rala Xanana Gusmão hala’o enkontru semanal ho Xefe Estadu José Ramos Horta, iha sorumutu ne’e parte rua ko’alia kona ba asuntu seguransa nu’udár preparativu ba eventu sira loron konsulta Populár 30 Agostu no vizita ofisiál Papa Francisco nian mai Timor-Leste.
Iha loron 13 fulan-Agostu premiadu Nobel na’in haat to’o iha Timor-Leste no iha mós eventu 20 Agostu loron FALINTIL no iha loron 28 Agostu Sekretáriu Jerál ONU António Guterres mai Timor-Leste.
Xefe estadu Jose Ramos Horta konsidera, partisipasaun Sekretáriu Jerál ONU ne’e hanesan vizita ida importante tebe-tebes no iha fulan-Setembru Papa Francisco nia vizita ofisiál mós mai Timor-Leste konforme programa sira ne’ebé feitu ona.
“Bá ita nia seguransa sira ne’e servisu todan, tenke servisu didi’ak, la’ós de’it tamba iha ameasa ruma, maibé para kontrola populasaun, no organiza didi’ak tamba dalaruma kuandu iha eventu boot ne’e ema hotu-hotu hakarak halai, dudu-malu depois akontese insidente ruma ita hotu la espera,” Prezidente Repúblika José Ramos-Horta hateten bá jornalista sira.
Prezidente Repúblika José Ramos-Horta hatutan, molok tama ba eventu resepsaun, Xefe Estadu sira no lider mundiál sira nia vizita mai Timor-Leste, sei konvoka reuniaun Konsellu Superior Defeza no Seguransa (KSDS) hodi halo análize ba situasaun seguransa iha territóriu nasionál, rejionál no mundiál.
“Tamba ne’e ko’alia ona ho Primeiru-Ministru para iha loron 09 fulan-Agostu sei iha reuniaun Konsellu Superior Defeza no Seguransa para haree de’it situasaun no análize preparativus sira seguransa nian ba vizita sira ne’ebé sei mai ne’e,” José Ramos-Horta sublinha.
Entretantu, Primeiru-Ministru Kay Rala Xanana Gusmão husu ba joven sira atu valoriza sakrifísiu husi inan-aman no ferik-katuas sira ne’ebé halo ona bá rai ne’e hetan independénsia.
“Ba joven sira favór ida labele permite violénsia iha ita nia rain,” Primeiru-Ministru Kay Rala Xanana Gusmão hateten.
Enkontru ne’ebe Xefe Governu Kayrala Xanana Gusmão ho Xefe Estadu Jose Ramos Horta ne’e nu’udar sorumutu semanal entre governu no presidente repúblika.
Jornalista: João Marito