![Durante Loron 16 ! C12N Verifika & Valida Dadus Sobrevivente Durante Loron 16 ! C12N Verifika & Valida Dadus Sobrevivente](https://sapnewstl.com/wp-content/uploads/2023/11/IMG-20231121-WA0001.jpg)
Durante Loron 16 ! C12N Verifika & Valida Dadus Sobrevivente
SAPNewsTL, Dili: Comite 12 Novembro (C12N) halo verifikasaun ho validasaun final ba sobrevivente sira iha territoriu Timor-Leste laran tomak hahu husi loron 20 fulan novembru to’o loron 6 fulan dezembru 2023.
“Ohin ita servisu hamutuk ho MACLN halo verifikasaun no validasaun final ba dadus sobrevivente 12 Novembru 1991, hahu husi rejiaun I, rejiaun II, rejiaun III no munisipiu Dili komesa iha loron 20 fulan novembru to’o loron 6 fulan dezembru 2023”, dehan Prezidente C12N Gregorio Saldanha ba jornalista sira iha sede C12N Balide, Dili segunda (20/11/2023).
Prezidente hatutan, sira halo verifikasaun no validasaun ba sobrevivente sira mai husi territoriu Timor-Leste tanba sira fo ona infomasaun ba estrutura sira iha kada munisipiu mak hato’o ba sobrevivente sira hotu depois halo publikasaun liu husi konferensia imprensa.
Maluk sira iha area izoladu sira informasaun la to’o ne’e servisu estrutura iha kada munisipiu mak fo, antes ne’e mos sira avizu iha kongresu nasional iha loron 6-7 fulan novembru 2023 sira fahe ona informasaun atu informa ba malu.
Nia informa tan, rejistrasaun ba sobrevivente sira hala’o kedas ona iha 2009, nune’e ohin ne’e C12N servisu hamutuk MACLN ho konsellu veteranu atu halo verifikasaun no validasaun ba dadus final ba sobrevivente nain-13.000.
Enkuantu, husi dadus ida ne’e 800 resin hetan ona sira nia direitu barak liu mak seidauk, nune’e nia hein katak verifikasaun no validasaun ne’e remata, sobrevivente hotu hetan sira nia direitu.
Entretantu, hahu husi loron 20 novembru to’o loron 6 fulan dezembru, C12N servisu hamutuk Ministério Antigos Combatentes da Libertação Nacional (MACLAN) halo verifikasaun no validasaun ba dadus 12 Novembru iha sede komite 12 Novembru Balide, Dili.
Sira hala’o verifikasaun no validasaun bazeia ba rejiaun, nune’e rejiaun I kobre munisipiu Lautem, Baucau, Viqueque no Manatuto sei hala’o iha loron 20- 21 fulan novembru 2023.
Rejiaun II kobre Covalima, Manufahi, Ainaro ho Aileu sei hala’o iha loron 22-23 fulan novembru 2023, rejiaun III kobre Bobonaro, Likisa, Ermera Ho Oe- Cusse sei hala’o iha loron 24-25 fulan novembru 2023 no munisipiu Dili sei hala’o iha loron 27 to’o loron 6 fulan dezembru 2023.
Reportajen: Augusto dos Santos