Selebra Loron Mundial ! EhD Hamutuk 16.000 Presiza Apoia Urgente

SAPNewsTL, Dili : Hafoin Primeiru-Ministru Kay Rala Xanana Gusmão ofisialmente halo abertura ba Loron Mundiál Ema ho Defisiénsia (EhD), Ministra Solidariedade Sosial no Inkluzaun Verónica das Dores husu Xefe Estadu no Guvernu hodi rekunhese no kondekora prioneiru ba ema ho defisiensia sira iha Timor Leste

“Husu ba Xefi Estadu no Xefi Governu ba tinan oin, wainhira selebra 20 de Maiu no 28 de Novembru, Governu presiza mós rekoñese no kondekora pioneiru no kontributór sira ba dezenvolvimentu inkluzivu no sustentável hosi setór defisiénsia, liuliu hosi organizasaun Ema ho Defisiénsia sira. Tanba susesu barak, autór ba dezenvolvimentu nasaun ne’e, mai hosi mós ema ho defisiénsia”. Dehan Ministra Solidariedade Sosial no Inkluzaun Verónica das Dores, iha CCD, 01/12/2023

Governante ne’e konsidera selebrasaun loron mundiál EhD importante tebes tanba hodi rekoñese, la’ós de’it Direitu Ema ho Defisiénsia iha Timor-Leste, maibé mós atu selebra talentu, kriatividade hosi maluk defisiénsia sira hotu iha área desportivas, edukasaun, arte no kultura.

“Ha’u hakarak enkoraja nafatin sosiedade sivíl sira hotu, liuliu organizasaun ba Ema ho Defisiénsia, atu mai ita hamutuk, iha asaun, hodi buka dalan, atu implementa programa no prioridades hirak-ne’ebé governu hatur ona, hodi bele atinje mehi boot mak Objetivu Dezenvolvimentu Sustentável iha Timor-Leste.” dehan Ministra.

Entretantu, Organizasaun EhD mos iha ona Planu Asaun Nasionál ba Ema ho Defisiénsia 2021-2030. Planu ida-ne’e sai hanesan ezemplu konkretu kona-ba partisipasaun ema ho defisiénsia  iha servisus parserias ho governu hodi asegura planu, no implementasaun ba planu sira-ne’e reflete duni ba prioridades no nesesidades ba ema sira ho defisiénsia.

Aleinde ne’e, Ratifikasaun Konvensaun Internasionál ba Direitu Ema ho Defisiénsia (UNCRPD)- sai hanesan vitória boot ida ba Timor-Leste.

“Ha’u hatene no akompaña, Konvensaun ne’e finalmente estadu ratifika, depoizde luta ne’ebé naruk iha tinan barak, iha nivel hotu- hotu. Entaun parabéns ba esforsu sira-ne’e hotu, hosi ema hotu no parte hotu-hotu.” Nia kongratula

Ministra mós rekoñese no orgullu ba setór defisiénsia iha Timor-Leste, tanba serbisu di’ak tebes no fó ona rezultadu barak, maske buat barak sei presiza kontinua luta.

“Parabéns ba loron Mundiál Ema ho Defisiénsia, liuliu iha Timor-Leste. Mai, ita serbí hamutuk hodi alkansa mehi boot ba futuru mak sosiedade Timor – Leste ida-ne’ebé Inkluzivu, prósperu, reziliente, sustentável no asesível.”

Iha fatin hanesan, Diretor Ezekutivo ADTL  Cezario da Silva  haktuir Ema ho Difisiensia iha Timor Leste tuir sensu 2022  hamutuk  93 mill   ho ema Difisiensia iha Timor Leste, tanba ne’e presiza asegura dezenvolvimentu ne’ebe inkluzivu no asesivél ba futuru.

“Asuntu Defisiensia issue ida ne’ebe uza setoral, ami nia hanoin laos deit iha komunikasaun maibe ami hakarak ba setor hotu atu atu asegura setor dezenvolvimentu ida ne’ebe inkluzivu”. Nia salienta

Cezario da Silva konsidera selebrasaun loron mudial ba EhD tinan ne’e pertinente tebes tanba fanun ema hotu atu salva hodi alkansa meta objetivu dezenvolvimento sustentavel no tema nasional, Timor Leste inkluzivu, prósperu, reziliente, sustentavel no asesivel.

Entretantu, Ema ho Difisiensia Iha Timor Leste tuir sensus 2022  relata katak hamutuk 93 mil, entre sira EhD hamutuk 16 mill prezisa tebes asesu espesifiku atu bele hetan  apoiu no hatan  ba sira nia nesesidade.

“Asesibilidade fisiko problema boot tanba exemplo kik deit agora dadaun iha CCD nian ne’e agora ami prekupa tanba sira atu ba haris fatin susar tebes, odamatan mos klot  no halo Difisiensia sira ne’ebe ho kursi roda susar atu tama, haris fatin tenki uza eskada mak tama Entaun susar uituan”. Nia prekupa.

Enkuantu, Partisipa iha selebrasaun Loron Mundiál  Ema ho Defisiénsia (EhD) ne’ebé monu iha dia 3 Dezembru 2023, MSSI ho Asosiasaun Defisiéntes Timor-Leste (ADTL) organiza atividade oioin durante loron tolu iha CCD (hahú dia 1-3 Dezembru) ne’ebé konvida no organiza reprezentante Ema ho Defisiénsia husi Munisípiu 12 no mós Rejiaun Administrativu Espesiál Oecusse Ambeno (RAEOA).

Jornalista : Ermelinda Soares & Dircia Baptista