MAE Sei Apoia Materiál & Subsídiu Ba Vítima Lakon Hela Fatin

SAPNewsTL, Dili – Liu husi sorumutuk Konsellu Ministru, Governu aprova ona projetu dekretu-lei, ne’ebe aprezenta husi Ministru Administrasaun Estatál Tomás do Rosário Cabral, kona ba apoiu materiál no finanseiru ba vítima, sira ne’ebé lakon hela-fatin.

Konsellu Ministru, loron neen (6) fulan Dezembru, 2023 aprova ona projetu dekretu-lei kona-ba apoiu materiál no finanseiru ba vítima sira ne’ebe lakon hela-fatin, tanba ahi han sira nia uma rasik ne’ebé sai hanesan sira nia hela-fatin permanente.

“Diploma ida ne’e, Governu propoin hodi kria medida espesiál ida oinsa rezolve ho definitiva ba kestaun hela fatin ba família sira ne’ebé hetan afetadu, ho rekursu materiál no finanseiru atu harii fali hela fatin permanente, ne’ebé sei halo iha rai ne’ebé família rasik maka hili. Aleinde ne’e, sei fó mós, subsídiu kada familia”, SAPnewsTL asesu liu komunikandu emprensa, Sorumutuk Konsellu Ministrus ne’ebe hala’o iha Palásiu Governu Dili, Quarta (06/12/2023)

Insidénsia ahi-han uma ne’ebé aumenta iha fatin ho populasaun ne’ebé boot, liuliu iha capital Dili, rezulta ona destruisaun totál ba hela fatin barak ne’ebé aumenta no muda família balu dala ida de’it.

Senáriu ne’e, aleinde reprezenta drama sosiál ida no humanitáriu ba família sira ne’ebé afetadu, nune’e mós hatudu falta meius ne’ebé adekuadu husi parte instituisaun públiku nian uainhira hasoru situasaun sira hanesan ne’e.

Estadu Timor Leste prevee katak sei fó apoiu materiál no finanseiru ba família sira ne’ebé lakon hela-fatin, tanba inséndiu ne’ebé la espera iha sira nia hela fatin rasik ne’ebé sai hanesan sira nia hela fatin permanente.

Família sira ne’ebé hateten katak, sira sei relokaliza sira-nia hela-fatin sai husi munisípiu Dili, sira iha preferénsia ba atribuisaun apoiu ne’ebé prevee ona iha Dekretu-Lei ne’e.

Apoiu sira ne’e inklui doasaun material konstrusaun to’o dolar amerikanu rihun sia ($9,000), tula materiál sira, osan selu badain nian (subvensaun ba mão de obra) to’o valór totál másimu dólar Amerikanu 1,500.

Transporte ba realokasaun no subsídiu mensál ba apoiu realokasaun familiár ho montante dólar amerikanu 500, sujeitu ba dotasaun orsamentu ne’ebé iha ba efeitu ne’e no bazeia ba projetu arkitetóniku padraun ne’ebé elabora husi Ministériu Administrasaun Estatál.

Jornalista : Marcela Mery da Costa