Klube K-LINK Husu FVTL Hasa’e Kapasidade Arbitrajen
SAPNewsTL, Dili: Klube Voleibol K-LINK husu ba Federasaun Voleibol Timor-Leste (FVTL) hasa’e kapasidade arbitrajen ba Liga Voleibol Timor-Leste (LVTL) iha futuru tanba sira konsidera foin daudauk divizaun dahuluk LVTL 2023 epoka dahaat lao ne’e arbitrajen sira foti desizaun la bazeia ba regulamentu legal.
“Ami hakarak FVTL hasa’e tan kapasidade arbitrajen sira ho kualidade para sira dirije jogu ho onestu, hatudu profesional no neutralidade tanba durante divizaun dahuluk LVTL 2023 la’o arbitrajen sira halo failansu barak tebes, tenki hare’e didiak ema sira inklina an iha federasaun liuliu arbitrajen labele inklina an tan iha klube sira tanba sei fo impaktu ba jogu rasik bele hamosu problema tanba sei afavor ba sira nia klube rasik.”
“Ami husi klube hakarak FVTL halo diak LVTL para jogador sira bele kompete ho jogador internasional sira liu husi jogu Sea Games, Asian Games no seluk tan”, dehan Prezidente Klube voleibol K-LINK Leonardo Beningo Tilman ba jornalista sira iha fomentu II, Dili kuarta (6/12/2023).
Prezidente hatutan, sira mos rekomenda tan ba FVTL tenki fo sansaun ba jogador sira ne’ebe la iha mentalidade diak tanba durante LVTL 2023 la’o sira observa jogador sira husi klube balun sei tolok malu no hatudu dixiplina iha kampu laran tanba sira nia klube K-LINk iha nia filozofia katak iha jogu, iha animasaun.
“Foin daudauk divizaun dahuluk LVTL 2023 la’o ne’e ami husi klube K-LINk senti triste ba desizaun arbitrajen sira nian tan ne’e ami husu ba FVTL hasa’e kualidade arbitrajen, nune’e sira iha kuñesimentu klean tanba foin daudauk ne’e desizaun arbitrajen la tuir realidade iha kampu maibe foti desizaun tuir hakarak deit la bazeia regra legal ruma implika klube sira nia vontade iha jogu “, tenik treinador
Afonso informa tan, sira husu mos FVTL tenki fo sansaun ba arbitrajen sira bainhira halo failansu iha jogu depois inklina an iha klube balun.
Iha fatin hanesan, treinador klube voleibol K-LINK Afonso A. Almeida husu ba FVTL hasa’e kualidade arbitrajen, nune’e sira iha kuñesimentu klean tanba foin daudauk ne’e desizaun arbitrajen la tuir realidade iha kampu.
“Rekursu tenki diak tanba durante ne’e LVTL 2023 ema hotu asiste arbitrajen foti desizaun tuir hakarak deit.”
Nune’e foti desizaun impaktu ba klube sira seluk no rekruta arbitrajen ne’e tenki hare’e mos ba nivel edukasaun ruma, labele lori deit kuñesimentu naton iha voleibol tanba sai arbitrajen tenki liu husi formasaun.
Nia afirma tan, sira mos manda ona karta ofisial ba FVTL bazeia ba desizaun arbitrajen no mos ba klube sira kona ba jogador sira koalia liafuan ladun edukativu duun fali klube seluk kaer aimoruk, lakoi simu konsekuensia bainhira lakon iha jogu tanba manan ka lakon depende ba estratejia klube idak-idak nian.
Enkuantu, Treinador ne’e m lakoi liafuan aat sira ne’e mosu tanba liga ba klube nia dignidade tan ne’e sira husu ba klube sira liuliu AD SLB eduka jogador sira atu nune’e koalia liafuan edukativu.
Reportajen: Augusto dos Santos