Klube K-LINK Kontente Sai Manan Datoluk Iha LVTL 2023
SAPNewsTL, Dili: Klube Voleibol K-LINK mane kontente sai manan nain datoluk iha divizaun dahuluk Liga Voleibol Timor-Leste (LVTL) 2023 epoka dahaat maski ba dahuluk kompete divizaun dahuluk liga voleibol.
“Ami nia partisipasaun iha LVTL 2023, ami nia klube K-LINk sai manan nain datoluk ba ida ne’e ha’u nu’udar Prezidente Klube orgullu no fo parabens ba treinador, jogador no ofisial sira tanba sira esforsu hatudu ona jogu diak maski ami nia klube foinsa’e husi divizaun daruak tama divizaun dahuluk.
“Nune’e prestasaun ami hetan optimal ona maibe ba oin ami tenki hadia buat balun sei menus liu-liu kompozisaun jogador sira”, dehan Prezidente klube K-LINk Leonardo Beningo Tilman ba jornalista sira iha Fomentu II, Dili kuarta (6/12/2023).
Prezidente hatutan, sira sei halo preparasaun diak liu tan, sei halo selesaun ba jogador sira liuliu ida kiik sira iha talentu voleibol hodi fo treinu tempu naruk ba sira no sira sei tuir kompetisaun rai laran no kompetisaun iha NTT, Indonesia.
Nia afirma, Klube refere existe ho nia vizaun no misaun atu fo oportunidade ba juventude sira ne’ebe iha talentu tanba durante iha klube oituan deit halibur jogador sira, nune’e nia hakarak hari’i klube voleibol K-LINK para ba futuru voleibol sai modalidade importante ida ba Timor-Leste.
Iha fatin hanesan, treinador klube voleibol K-LINK Afonso A. Almeida senti kontente no agradese tanba sira nia klube K-LINk sai manan datoluk iha LVTL divizaun dahuluk 2023 maski mai husi divizaun daruak ultrapasa mai divizaun dahuluk.
“Ha’u senti kontente no agradese tanba ami nia klube K-LINk sai manan datoluk iha LVTL datoluk iha divizaun dahuluk Liga Voleibol Timor-Leste (LVTL) 2023.”
“Divizaun dahuluk 2023 maski mai husi divizaun daruak ultrapasa mai divizaun dahuluk tan ne’e ba dahuluk kompete divizaun dahuluk nune’e ho esforsu rasik hodi tenta hakarak sai manan nain dahuluk ho klube sira seluk maibe to’o ikus ami nia esforsu to’o manan datoluk maibe hein katak iha futuru ami sei hadia diak liu tan”, tenik treinador.
Treinador informa tan, iha futuru klube sei hadia buat barak mak jogador sira tenki dixiplina, kumpre regra klube nian, kuidadu saude, ativu treinu atu nune’e bele kompete ho klube sira seluk no sira mos sei buka jogador idade kiik sira hodi fo treinu ba tempu naruk tanba jogador voleibol iha Timor-Leste ne’e limitadu tebes.
Portantu, klube voleibol K-LINK sai manan datoluk iha divizaun dahuluk LVTL 2023 epoka dahaat simu premiu orsamentu montante 4000 USD no medalla.
Reportajen: Augusto dos Santos