Avó Felix Hili Lata-Mamuk Sustenta Moris
SAPNewsTL, Dili : Sidadaun Felix Soares ho otas ne’ebe katuas ona, maibe kada loron sempre ba fatin lixeiru hili hahan restu hodi fo han fahi tanba laiha hahan ba fahi ne’ebe nia hakiak.
Avo Felix Soares hateten, loro-loron nia sempre hala’o atividade hili hahan restu iha lixeiru hodi fo han fahi no hili mos lata mamuk hodi troka ba osan tanba laiha kbit naton ba sustenta nesesidade kuotidianu.
“Lor-loron hala’o atividade mak ida ne’e deit, hili hahan restu no lata mamuk sira, tanba ha’u nia otas mos badak ba daudaun no laiha servisu iha uma. Entaun buka hahan restu iha sampa (lixeiru) atu fo han fahi, tanba gosta tebes hakiak animal no halo negosiu.” Tenik Avó Felix Soares ba Jornalista iha Lesidere, 06/12/2023
Felix Soares hatutan, Lata mamuk ne’ebe nia hili iha lixeiru kada loron la barak, nune’e nia hili no rai hamutuk to’o barak mak lori ba faan hodi uza osan ne’e ba sustenta nesesidade lor-loron.
“Laos de’it ha’u hili hahan restu maibe ha’u mos hili kalen mamuk sira atu tau hamutuk hodi tetu, maibe kada loron la hetan barak entaun kleur mak lori ba tetu no hola fali hahan”. Felix hateten
Felix Soares haktuir, tinan barak ona nia hela iha Dili desde Portuges nia tempu to’o ohin loron, nia informa ema hirak ne’ebe sira idade hanesan fila hotu ona ba Aman Maromak nia kadunan santu.
“Ha’u mai iha Dili ne’e seidauk sidade hanesan agora ne’e, uluk ne’e sei ai laran boot, ha’u nia kolega sira ne’ebe uluk ami hamutuk agora mate hotu ona hela ha’u mesak”. Nia konta
Durante hili hahan no lata mamuk iha Lesidere, Avo Felix sente la tahan ho loron nia manas, entaun nia hakbesik ba fatin mahon hodi helik an, hafoin kontinua hikas ninia atividade refere.
Felix Soares sempre sai husi uma hela Lesidere iha madrugada tuku 6 hodi ba fatin sira ne’ebe komunidade sira soe lixeiru ba, Avó ne’e mos sai husi uma madrugada tau iha nia pasta paun no bee agua ida hodi aguenta kabun nia halerik wainhira hamlaha.
Hafoin hili, Avó Felix tau hahan ne’ebe nia hili no lata mamuk ne’e tau iha plástiku hodi leba lori ba uma hela fatin.
Enkuantu, Felix Soares mos sempre hetan ajuda no apoia husi Madre Canossiana sira ho hahan, mina, ropua no selu-seluk tan.
Jornalista : Ermelinda Soares