SLB Sai Kampiaun LVTL ! Xanana Kongratula Klube Sira Hotu
SAPNewsTL, Dili: Prezidente Klube Voleibol AD SLB Jose Alexandre Kayrala Xanana Gusmão sente kontente AD SLB sai kampiaun Liga Voleibol Timor-Leste (LVTL) 2023 époka dahaat no mos kongratula jogador no klube sira hotu maka partisipa iha LVTL tinan ne’e.
“Ami kontente tanba manan maibe ekipa Choque hatudu jogu kapas tebes, iha desportu ida tenki manan no ida tenki lakon ne’e iha ne’ebe deit, nune’e loron ida lakon aban manan fali.
“Ha’u hakarak fo parabens ba jogador sira husi kedas la manan premiu to’o manan dahuluk, daruak, datoluk ho dahaat no klube sira hotu lori nia jogador sira mai partisipa iha liga voleibol tinan ne’e maski todan oituan klube sira iha Timor-Leste atu moris susar tebes”, dehan Prezidente AD SLB Jose Alexandre Kayrala Xanana Gusmão ba jornalista sira iha jinajiu desportu Dili tersa (05/12/2023).
Iha sorin seluk jogador Choque Jefranio da Silva Neves hatete, sira hatudu jogu diak maibe faila iha tekniku jogu no sente triste tanba fo istoria tristeza dahuluk ba klube Choque.
“Ohin, ami nia jogu ha’u senti diak maibe ami hetan failansu iha tekniku jogu nian ikus mai ami derrota ho AD SLB skore 3-0, nune’e hau senti triste tebes ba dahuluk iha istoria ami nia klube Choque nian maibe ida ne’e hanesan lisaun ba ami hadia diak liu tan iha futuru”, tenik Jefranio.
Entretantu, iha jogu final LVTL 2023 epoka dahaat klube AD SLB Laulara feto kontra Klube Choque feto rezultadu final klube AD SLB manan klube Choque ho skore 3-0 husi set tolu, set dahuluk AD SLB manan 25-21, set daruak AD SLB manan 25-15 no set datoluk SLB manan 25-23.
Rezultadu jogu final LVTL 2023 epoka dahaat klube AD SLB mane manan klube Choque mane ho skore 3-0 liu husi set tolu, set dahuluk AD SLB manan 27-25, set daruak 25-20, no set datoluk AD SLB manan 25-20.
Klube AD SLB feto mane sai kampiaun LVTL 2023 epoka dahaat simu premiu orsamentu montante 16,000 USD tanba kada ekipa hetan 8000 USD, medalla no tasa ida.
Klube Choque feto mane manan daruak hetan premiu orsamentu montante 12,000 USD kada ekipa 6000 USD no medalla, klube ADR União feto manan datoluk simu 4000 USD, klube Assalam feto manan dahaat hetan 2000 USD, klube K-LINk mane manan nain datoluk hetan 4000 USD no klube Atone Ambeno mane manan nain dahaat simu 2000 USD.
Reportajen: Augusto dos Santos