Pe. Jacinto Konsidera Joven Barak La Hatudu Respeitu & Domin Ba Inan Aman Sira

SAPNewsTL, Lautem: Iha missa agradesimentu ba tinan tuan no missa sagrada familia iha igreja São Paulo Lospalos, Pe. Jacinto Gusmão hateten ema moris presiza haraik an no hatudu domin ne’ebe maromak hatudu ne’e ba ema hotu.

Tuir Pe. Jacinto Gusmão iha nia homilia informa iha tempu atu hadomi no iha tempu atu harii dame, iha tempu atu moris iha tempu atu mate, iha tempu hamnasa iha tempu atu triste, tanba ne’e presiza atu hadomi no atu hari’i dame.

“Ita presiza hadomi no haraik an tanba durante tinan 2023 tanba ita lahadomi malu, ita hamosu konflitu iha fatin-fatin, oho malu, duni malu, sempre akontese, tanba bainhira istori malu trata malu i mos bikan kanuru tarutu iha uma laran, ita lahadomi malu ne’e hotu akontese iha tinan 2023 buat sira ne’e hotu ohin ita passa ona no atu liu ona, hela minutu balun ita atu husik esperiensia diak no esperiensia aat ne’ebé ita hetan iha tinan ida ne’e nu’udar lisaun mai ita hotu atu aprende no hanoin”. Dehan Pe. Jacinto Gusmão liu husi nia homilia iha igreja São Paulo Lospalos, Domingo, 31/12/2023

Padre Jacinto hatutan wainhira dehan hadomi presiza haraik an, presiza hatudu domin ba ema ho domin ne’ebe maromak hatudu presiza halo an sai kiik no haraik an hodi hadomi hanesan Jesus hatudu iha ne’ebe moris iha bibi luhan ida.

“Se ha’u hadomi ha’u presiza haraik an hodi hatudu domin ne’ebé maromak hatudu mai ha’u, haree ba Jesus ne’ebé prega iha kruz tanba nia hadomi ita, haree ba prezepiu laran Jesus halo nia an sai kiik no moris iha iha bibi-luhan tanba domin no haraik an, tanba haraik an mak nia rona aman ka obesede ba aman maromak hodi moris iha bibi-luhan, terus hodi prega iha kruz tanba deit atu salva ita ema, nia mate ba ita laos ba nia an rasik, tanba ita nia salan sira ita presiza moris tuir i hadomi hanesan nia hadomi”. Tenik Amo Jacinto.

Amo Jacinto ne’e mos husu ba Joven sira atu respeita no hadomi inan aman tanba inan aman mak halo sira sai boot inan aman mak hamoris sira nune’e presiza respeita no hadomi.

“Ita presiza hadomi inan aman, liu-liu ba joven sira, hadomi no respeita ita nia inan aman tanba sira iha mak ita moris, sira laiha ita labele moris, maromak kria ita mai iha mundu liu husi ita nia inan aman sira, tanba ita presija hadomi no respeita sira la’os sama fali sira nia ulun”. Padre hameno.

Padre ne’e mos haklean joven sira la hadomi ona nia inan aman tanba ne’e nia hameno atu nafatin respeita no hadomi.

“Ohin loron liuliu ba joven sira feto no mane laiha ona domin ba inan aman sira tanba ita ohin selebra sagrada familia, ita temi kona-ba familia joven sira nunka hadomi nia aman inan realidade hatudu momos no ha’u mos esperiensia no haree ho matan rasik la hadomi nia inan aman tanba ne’e ita presiza hadomi ne’ebé presiza haraik an ne’ebé hanesan Jesus sei kiik no prega iha kruz, ema halo aat hasoru nia maibe nia simu nafatin tanba ne’e presiza hadomi no agradese”. Nia hakotu

Jornalista : Luis Pailofo