Pe. Jacinto : Moris Ne’e Presiza Hatene Agradese

SAPNewsTL, Lautem: Padre Paroku Paroquia São Paulo Lospalos Pe. Jacinto Gusmão hateten ema hotu presiza hatene agradese ba maromak ba tinan tomak ne’ebe Na’i oferese no nafatin kontinua husu bensaun paz no domin nian ba maromak.

Tuir Pe. Jacinto Gusmão liu husi nia homilia wainhira selebra missa agradesimentu ba tinan tuan 31 Dezembru 2023 iha igreja São Paulo Lospalos hateten presiza agradese ba maromak ba tinan tomak ne’ebe akompaña ona no presiza mos husu bensaun atu tinan foun ne’ebe mai bele iha hanoin foun hodi kria paz iha sosiedade.

“Ita agradese ba maromak tanba tinan tomak ita simu tiha ona, agradese tanba ne’e iha eukaristia santa, eukaristia katak jesus nia lian ne’ebé bolu iha liafuan rua ne’ebé ita prejiza hatene agradese no husu bensaun”,

“Ita agradese ba tinan tomak tanba ita hetan grasa barak durante tinan ida, no ita husu fali bensa ba tinan foun ne’ebé mai atu maromak tulun ita hodi nune’e tinan foun ida ne’e mai ita hanoin foun fuan foun, kria paz no domin iha ita nia moris sosiedade, familia, no ita nia rain”. Dehan Pe. Jacinto Gusmão liu husi nia homilia iha igreja São Paulo Lospalos, Domingo, 31/12/2023.

Amo Jacinto hatutan iha missa kalan ne’e hamutuk ho intensaun ida atu sai ida de’it ho maromak ho tempu oituan ne’ebe hamutuk maromak sei fo ksolok no fo tempu wain liu tan.

“Ita hotu ne’ebé ohin halibur hamutuk iha Paroquia ida ne’e ho intensaun ida katak sai ida ho maromak, uniaun ho maromak, ida ne’e mak ita hotu nia intesaun tanba ne’e mak ita ohin mai halibur iha ne’e, iha tempu oituan ne’ebe ita fo ksolok ba maromak atu nia sei fo tan tempu barak mai ita hodi kontinua haksolok ba ita hotu ne’ebé mak ohin iha ne’e tanba ita iha intesaun ida de’it”. Tenik Pe. Jacinto

Pe. Jacinto ne’e hameno ba sarani sira atu nafatin halo orasaun atu hetan tulun husi maromak hodi kontinua hala’o knaar iha mundu.

“Ita agradese ba maromak atu tulun ita liuliu iha hanoin ida deit,hodi haraik an, bainhira ita haraik an ita presiza nafatin agradese ba maromak, dedika ita nia an hodi kontinua halo orasaun hodi Na’i Maromak fo tulun mai ita, fo bensaun ba ita hodi hala’o ita nia misaun hotu ne’e ho di’ak, nune’e loron ikus ita bele tama hamutuk ho maromak iha lalehan”. Nia husu

Padre ne’e mos husu ba ema hotu-hotu atu agradese ba malu nu’udar familia ne’ebe sempre tulun malu.

“Agradese ba maromak no ita mos agradese ba malu iha ita nia familia nomos fo tulun ba malu, joven lubuk ida ohin loron sira lahatene agradese, ema fo tulun ba sira, tau matan ba sira ikus mai sira balun sama fali no halo a’at ba ema hirak ne’ebé tau matan no tulun sira tanba ne’e prejiza agradese”. Nia hakotu

Jornalista : Luis Pailofo