Dom Leandro Husu Sarani Lautém Fiar De’it Ba Maromak

SAPNewsTL, Lautem: Iha Parokia São Paulo Lospalos, Bispo Dioseze Baucau Dom Leandro Maria Alves informa ba sarani sira atu halo sira nia an sai kiik no kiik iha fiar hodi fiar deit iha maromak ida deit no tau an iha maromak.

Iha homilia Amo Bispo Dioseze Baucau Dom Leandro Maria Alves haktuir sarani sira buka atu sai ema ne’ebe kiik iha fiar hodi fo totalidade ba maromak no fiar iha maromak ida deit.

“Imi buka atu sai kiik, imi la halo imi an sai kiik karik nu’udar labarik oan ida imi sei la tama iha reinu lalehan, kiik iha fiar laos kiik iha fiziku maibe kiik iha ita nia fiar defende total ba maromak tau imi nia an tomak iha maromak, fiar maromak ida deit”.Dehan Bispo Dioseze Baucau Dom Leandro Maria Alves liu husi nia homilia iha igreja São Paulo Lospalos, Kuarta, 31/01/2024

Bispo Dioseze Baucau ne’e hatutan sarani sira buka oinsa fiar deit iha maromak ida depende deit ba maromak no entrega an tomak ba maromak.

“Buka fiar iha maromak ida de’it, labele fiar fali tun sae maibe fiar maromak ida ne’e mak dehan kiik ne’e, kiik katak buat hotu-hotu ita depende deit ba Na’i maromak, ita entrega ita nia an”. Tenik Bispo Dom Leandro

Bispo Dom Leandro akresenta entrega an tomak ba maromak konsidera hanesan maromak nu’udar inan ida ne’ebe hiti hela ita lor-loron.

“Entrega an tomak ba maromak hanesan ita ne’e iha maromak ninia liman, ita nia moris ne’e hanesan Na’i maromak, tane ita iha maromak nia liman ka maromak ne’e hanesan inan ne’ebe mak hiti hela ita lor-loron ida ne’e mak dehan ita sai kiik ne’e”. Bispo Leandro salienta

Bispo Leandro fundamenta”Jesus husu ita sai kiik katak husu ita atu haboot ita nia fiar iha Na’i maromak”. Dom Leandro hatete

Iha sikun seluk, Bispo Dom Leandro husu ba sarani sira buka hadomi malu no buka atu hakoak ema hotu.

“Hahalok hadomi malu ne’e mak importante, imi rasik sei halo renovasaun ba promessa baptizmu ninian hakribi sala no satanas sira hafoin fiar iha maromak hahalok satanas ka diabu ne’e mak hafahe ne’e kria problema ne’e hahalok diabu ninian, buka atu konfesa hodi sai ema ne’ebe hakoak ema hotu-hotu iha ita nia moris”. Dom Leandro hameno

Jornalista: Luis Pailofo