“Vise Reitora UNTL Orgullu, Estudante Sira Hari’i Mídia Rasik”

SAPNewsTL, Dili : Vise Reitora Asuntu Estudantil, Universidade Nasionál Timor Lorosa’e (UNTL) Dra. Ligia Tomas Correia orgullu ho estudante akadémiku no foinsa’e sira ne’ebe deside halibur hamutuk hari’i Mídia SAP News Timor Leste.

SAPNewsTL : Se mak Dra. Lígia Tomas Correia ?

Vise Reitora UNTL : Doutora Lígia Tomás Correia, S.pt., M.sc., ho idade 57 Moris iha Lospalos, 10 Marsu 1967, Profisaun hanesan Dosente iha Universidade Nasional Timor Lorosa’e (UNTL), agora daudaun asume responsabilidade Vise-Reitora ba Asuntu Estudantis, UNTL, enkuantu antes ne’e sai adida edukasaun RDTL iha Embaixada Jakarta – Indonesia (Periodu 2017 – 2019), Pro-reitora ba asuntu kooperasaun, UNTL (periodu 2011 – 2016).

Agora daudaun mos nu’udar Konseleira ba ESHANA  (Estudante Hadomi Ambiente) FEG – UNTL, Konseleira ba Grupu Koral  sta. Cecilia, Parokia Balide, Membru Extraordinária iha União Nasional dos Esquteiros de Timor-Leste ( UNE-TL), Atul Vise-Presidente Kooperativa Feto Timor-Leste (KOFETIL), no Presidente das Mulheres Académicas (AMA) – UNTL.

Enkuantu, iha tempu hanesan Mídia SAPNewsTL hili ha’u sai konseleira ba mídia refere ho mandatu permanente ho sinerjia no ispíritu atu hametin no haburas dezenvolvimentu meiu komunikasaun sosial iha Timor-Leste.

 SAPNewsTL : Oinsa ita hatene Mídia SAPNewsTL ?

Vise Reitor UNTL : Uluk knana’in, ha’u hakarak fo parabéns ba Mídia SAP News Timor-Leste ne’ebe festeza dois anus ba ninia ezistensia, ha’u seidauk iha koñesimentu barak kona-ba Mídia SAPNewsTL, maibe ha’u akonpaña hela Mídia SAPNews nia notisia dala barak, dala barak mos iha aktividade ne’ebe hala’o iha UNTL, SAPNews sempre halo kobertura no intervista ha’u iha Gabinete estudantis, antes ne’e iha mos intervista dala rua ou tolu.

Durante ne’e, ha’u rona deit informasaun katak Mídia SAPNews estabelese hosi joven akademiku sira no foinsa’e sira, ne’e ideia neebe mak diak no furak, espiritu foun nu’udar joven Timorense ha’u sente katak ne’e pertenente tebe-tebes, matenek ne’ebe sira iha bele kontribui liu hosi atividade ne’ebe maka ligadu ho informasaun ne’ebe presiza mos partilla ba públiku, liuliu ba Timoroan sira ne’ebe iha rai-liur tantu rai-laran.

Mídia ne’ebe foun ne’e, neste momentu involvimentu hosi estudante UNTL sira, hosi parte Estudante Fakuldade Engenharia, hanesan dadaun nia Diretor Ezekutiva hanesan senadu Fakuldade Engenaria Ciensias i Teknologia (FECT), Nia membru mos barak mak estudante husi UNTL no informasaun ne’ebe hau hetan katak SAPNews nia membru ne’e laos deit husi parte UNTL maibe iha mos hosi Universidade Privada sira iha mos husi eskola Sekundaria, informasaun barak maka ha’u akonpaña, tanba Senadu Sergio sai Prezidente iha Fakuldade Engenaria entaun iha mos núumeru WhatsApp telefone ho ha’u (Vise Reitora) entaun bainhira nia estatus WhatsApp ne’e dalabarak ha’u akonpaña informasaun, ha’u agradese teb-tebes ba inisiativa, komitimentu no kontribuisaun murak ne’e.

SAPNews ne’e diak no pozitivu tebe-tebes, informasaun sira ne’e ha’u hare katak informasaun ne’ebe atual no realidade, informasaun ne’ebe maka los no klaru, ha’u fiar katak informasaun sira ne’e bele tulun ema hotu-hotu bele akompaña i bele mos sai hanesan referénsia ba ema sira ne’ebe hakarak no interese atu hatene informasaun foun.

SAPNewsTL : Mensajem Vise Reitora UNTL Ba SAP News Timor-Leste ?

Vise Reitora UNTL : Mensajen ba Mídia SAPNews Timor-Leste, kontinua mantein ho boa vontade ka espiritu diak hodi haboot imi nia mídia foun ne’e iha nasaun foun ida ne’e, imi mesak joven  sira hamutuk hodi kontribui no hari’i mídia SAPNews, ha’u espera katak imi nafatin ezistente no forte nafatin ho espiritu foun kontribui no haklaken informasaun ne’ebe maka pozitivu, sertu no realidade. Nune’e informasões sira ne’e bele tulun komunidade liuliu joventude Timoroan sira bele akonpaña ho diak. Ba imi nia dedikasaun no sakrifisiu tomak ha’u hasai sapeu, imi bele no bele duni simu responsabilidade hodi servi ita nia rain liu husi fo sai informasaun ba povu Timor-Leste.

SAPNewsTL : Esperansa Vise Reitora UNTL Ba SAP News Timor-Leste ?

Vise Reitora UNTL : Ba Mídia SAPNews Timor-Leste, ha’u nia oan doben sira, ha’u iha esperansa katak nia inisiu hari’i ka konstrusaun ne’e hosi joven akademiku sira, ha’u sempre iha esperansa boot katak joven sira ne’ebe maka iha hanoin diak, ispiritu diak atu hari’i SAPNews nee ba oin, kontribuisaun sempre iha pasu pozitivu, ho sira nia matenek, siénsia no vangajen siéntifika ne’ebe maka durante ne’e sira aprende, iha universidadeno iha fatin sira seluk ne’e sei tau hamutuk kontribui ba dezenvolvimentu nasaun nian.

Dala ida tan, ha’u fo parabens ba ema hotu ne’ebe kontribui direita no indireita ba konstrusaun mídia foun ne’e, imi hotu nia servisu no kosar ween, vale apena terus hirak ne’e sei sai ksolok no naroman foun ida ba povu Timor Leste.

Jornalista : Conzita da Silva Mota