Senadu Jeral UNTL : “Mídia Labele Sai Instrumentu Polítiku Ba Partidu Ida”

SAPNewsTL, Dili : Iha Entrevista SAPNewsTL ho Senadu Jeral, Universidade Nasionál Timor Lorosa’e (UNTL), atual Senadu Fakuldade Direitu, Cristovão de Araújo husu Midia sira liliu SAPNewsTL atu labele sai instrumentu politk]iku ba partidu ida iha Timor-Leste.

SAPNewsTL : Oinsa ita boot nia konesementu kona-ba média SAPNews ?

Senadu UNTL : Ba dahuluk agradese ba Média SAPNews tanba bele mai iha Gabinete Senadu Jeral nian atu bele husu konesementu senadu jeral nian ba aniversáriu no ezistênsia média SAPNews iha Timor-Leste. Ita hotu agradese tamba iha Timor-Leste, ita bele iha média hanesan SAPNews ne’ebé maka tinan rua ona hala’o nia servisu, hala’o ninia kna’ar iha Timor-Leste ne’ebé maka ajuda tebe-tebes ita nia komunidade kona-ba atualizasaun informasaun iha ita nia rai-laran liuliu ba situasaun polítika, situasaun ekonómika  no situasaun sosial.

Ema hotu hatene katak iha estadu de direitu demokrátiku, média dezenpenha nia papel importante tebe-tebes tanba atu tulun ita nia sosiedade, tulun ita nia sidadaun sira atu hatene kona-ba informasaun sira no akontesimentu sira ne’ebé akontese iha rai-laran. Aleinde ida ne’e iha estadu demokrátiku sira média ne’e hanesan meius ida ne’ebé maka atu fasilita sidadaun sira atu bele expresa ka exprime, manifesta sira nia pensamentu, lamentasoens, difikuldades, preokupasoens, sira nia aspirasaun ba ita nia autoridade estadu sira.

Iha estadu de direitu demokrátiku, média nia ezistênsia bele fó espasu ba sidadaun sira atu bele uza didiak sira nia direitu fundamental ida hanesan liberdade expresaun tanba ita hatene katak iha estadu de direitu demokrátiku,sidadaun hotu-hotu livre atu bele manifesta ka livre atu hato’o sira nia observasaun no sira nia lamentasoens ba kualker desizoens polítika sira ne’ebé produz hosi autoridade estadu sira.

Média SAPNewsTL nia ezistênsia ne’e hanesan mós kontrolu sosial ida tanba liu hosi informasaun sira ne’ebé maka média sira rekolla iha baze ajuda tebes governante sira para atu bele hatene kona-ba preokupasoens sira ne’ebé komunidade sira infrenta iha baze liuliu  problema sosial sira ne’ebé maka sira hasoru.

SAPNewsTL : Saida maka ita haree hosi Média SAPNews ?

Senadu UNTL : Durante ezistênsia média SAPNews, ha’u apresia no orgullu tebe-tebes tanba durante ne’e SAPNews ativa tebe-tebes iha ita nia rai-laran ne’ebé ajuda fahe informasaun ba ita nia sosiedade, Ita nia sidadaun sira konsege duni hetan informasaun ne’ebé kredivel no informasaun ne’ebé verdadeiru hosi média SAPNews tanba média SAPNews ne’e sempre divulga no atualiza hela deit situasaun atual ba ita nia sosiedade.

SAPNewsTL : Ita nia mensajen SAPNews iha ámbitu aniversariu ba daruak ?

Senadu UNTL : Ha’u nia parabens ba fundadores SAPNewsTL, nomos ba maluk jornalista sira ne’ebé haknaar an iha Média SAPNews ba ita boot sira nia vontade, fidelidade, lealdade, seriedade, boa fé ne’ebé maka durante ne’e ativa tebe-tebes hodi ajuda fahe informasaun  ba ita nia sosiedade.

Senadu Jeral hakarak rekomenda ba ita nia média SAPNews iha aniversariu ida ne’e maka husu maluk jornalista sira kontinua nafatin ativu hala’o servisu ho profisional, servisu ho imparsial, nune’e bele garante kredibilidade ne’ebé diak liuliu informasaun ne’ebé kredivel atu sosiedade bele konsumu informasaun ne’ebé loos no diak, nune’e labele hamosu fali polémika iha sosiedade.

SAPNews kontinua hala’o servisu dezenpenha funsaun média nian to’o iha baze liliu suku no aldeia sira ne’ebe enfrenta problema sosial barak, iha ita nia área remota sira ne’ebá rekolla preokupasaun sira no problema sosial sira ne’ebé maluk sira hasoru iha área remota, nune’e ita nia governante sira bele  tau atensaun tanba iha área remota sira ne’ebá ko’alia kona-ba asesibilidade ne’e menuz tebes.

Tan ne’e liu hosi prezensa média SAPNews nian presiza ajuda foti informasaun no preokupasaun sira ne’ebé komunidade sira hasoru iha área rurais, wainhira fó sai entaun bele fó atensaun ba governante sira bele halo polítika ida ne’ebé diak liuliu polítika públika hodi responde ba preokupasaun ne’ebé maka sira enfrenta.

Dala ida tan husu média atu imparsial nomos média labele sai hanesan instrumentu polítiku ida nian ne’e importante tebe-tebes, tanba média tenki imparsial para fahe informasaun ida ne’ebé kredivel, loos no balansu, nune’e labele iha organizasaun polítika ida, média ativa tebe-tebes, iha organizasaun polítika seluk média ne’e la ativa entaun labele, Ha’u husu média atu labele kria polémika ba iha sosiedade, hala’o servisu o profisional no produz notísia investigativa jornalistika ne’ebé kualidade hodi kontribui ba dezenvolvimentu país nian.

SAPNewsTL : Ita nia esperansa ba Média SAPNews iha futuru ?

Senadu Jeral : Ha’u nia esperansa ba SAPNews iha futuru maka SAPNews sei bele dezenvolve diak liu tan sai média ida ne’ebé maka ativu, modelu, espellu no ezemplu ba mídia sira seluk iha Timor-Leste.

Jornalista : Marcela Mesquita Lemos