MOFA Kongratula Mídia SAPNewsTL ! Sai Mídia Independente

SAPNewsTL, Dili : Presidente Movimentu Foinsa’e Atsabe (MOFA) husi Munisipiu Ermera, Igitro dos Santos de Jesus kongratula Mídia SAP News Timor Leste ne’ebe eziste tinan rua ona, Igitro konsidera papel mídia importante tebes ba kontrolu sosial hodi asegura desizaun polítika sira ne’ebe afavor ba povu nia moris diak

SAPNewsTL : Oinsa MOFA nia hatene kon ba SAP News TL ?

MOFA : Presidente Movimentu Foinsa’e Atsabe (MOFA) felisita no parabeniza ezisténsia Mídia  SAPNewsTL nia aniversáriu ba dala rua ne’ebe eziste iha pais ida ne’e, Ha’u konhese SAPNews TL iha tinan hirak liu ba,  Ha’u haree SAPNewsTL nu’udar mídia ida ne’ebe sai lian ba ema lian laek sira ho ispíritu foinsa’e no vontade juvenil ne’ebe forte tebes iha dezenvolvimentu komunikasaun sosial nian.

SAPNewsTL sempre fo sai informasaun aktual sira no informasaun sira ne’ebe bazeia ba faktus ka bazeia ba realidade ne’ebe maka ita nia sosiedade hasoru, informasaun hirak ne’e bele fasilita komunidade hatene diak liuta situasaun iha rai laran no rai liur, ha’u gosta tebes hahalok sira ne’e hosi SAPNewsTL.

SAPNewsTL : Mensagem MOFA ba SAPNewsTL ?

MOFA : Ha’u nia mensajem ba Jornalista sira hotu maka la’o hamutuk nafatin, imi nia knar hanesan Jornalista iha pais estadu de direitu demokrátiku. Papel Mídia nian importante hanesan kontrolu sosial ba mahukun sira, tanba ita hatene katak sei iha estadu de direitu demokrátiku ida ne’e, la iha kontrolo sosial ne’e tendénsia poder  ba korupsaun no tendénsia ba hanehan ema sira iha kraik.

Jornalista nia papel ne’e importante no krusial tebes ba nasaun ne’e, imi tenki sai nafatin lian ba lian laek sira, sai nafatin inspirasaun ka lian atu bele lori sosiedade sira aspirasaun to’o na’i ulun sira, inklui kontrola nafatin na’i ulun sira nia desizaun polítika sira ne’ebe maka nai ulun sira halo atu ita nia sosiedade bele hatene realidade no objetivu ne’e rasik.

SAPNewsTL : Ita nia esperansa saida ba futuru ?

MOFA : Ha’u nia esperansa ba Media SAPNews TL iha futuru  sai mídia ida ne’ebe diak no dezenvolve an diak liu tan, Sai mídia ida ne’ebe independente, transparante, kualidade no garante informasaun ida ne’ebe diak ba ita nia sociedade no sai mídia ida ne’ebe  bele tuir duni nia substansia lolos hanesan lian ba lian laek sira nian.

Jornalista : Conzita Mota