Hafoin Hetan Asidente ! Saudozu “Laran Luak” Fila Hikas Ba Aman Maromak
SAPNewsTL, Lautem: Saudozu Francisco da Costa Miranda “Laran Luak” fila hikas ba Aman Maromak nia kadunan santu, hafoin hetan asidente iha Lautém, nune’e saudozu halo’ot ona iha semitériu jardim dos herois e martires da patria Assalaino-Lospalos.
Prezidente Conselho Combatentes da Libertação Nacional Munisípiu Lautem Aurélio Freitas Ribeiro hateten tuir lolos saudozu halo’ot iha nia moris fatin maibe ohin lori mai iha jardim dos herois ida ne’e tanba fo valorizasaun ba nia luta libertasaun patria.
“Ohin ita hamutuk iha fatin ida ne’e hodi asiste funebre ita nia saudozu Francisco da Costa Miranda, nia husi Luro Suku Baricafa nian, tuir kultura kala merese liu nia deskansa ikus ne’e iha nia moris fatin maibe ohin mai iha Jardim dos Herois ida ne’e tanba nia halo buat ida, nia hamutuk ho nia inan aman ho veteranus sira ho nia maluk sira defende kauza ida mak kauza libertasaun patria ninian, tanba ida ne’e liu husi ita nia konstituisaun RDTL artigu 11 husu ba estadu atu bele rekuñese no valoriza ba ema sira ne’ebe kontribui ba luta libertasaun da patria ida ne’e, bazeia ba ida ne’e ohin ita hala’o”. Dehan Prezidente CCLN Munisípiu Lautem Aurélio Freitas Ribeiro iha jardim dos Herois e Martires da Patria Assalaino-Lospalos, 5/03/2024
Prezidente CCLN Munisípiu Lautem ne’e hatutan haree ba preokupasaun familia nian kona-ba tau matan ba faluk no oan kiak CCLN nafatin konsidera ko kria kondisaun ba sira tuir lei ne’ebe iha.
“Ita nia saudozu husik hela faluk oan kiak mai ita mai estadu RDTL, ohin familia husu atu ita hotu bele haree tau matan no kria kondisaun ida loke dalan ba sira hodi nune’e sira mos hetan fatin iha rai ida ne’e,”
“Conselho Combatentes da Libertação Nacional nafatin konsidera pedidu ida ne’e hanesan knaar konsellu ninian atu asume, konsellu tau an hanesan ponte ida atu liga kombatente ka familia ba estadu no guvernu kiik boot estadu nia liman liliu guvernu nia liman, ha’u fiar katak ita nia guvernu sei esforsu an hodi tau matan ba familia kombatente hotu tuir kbiit no tuir lei ne’ebe iha”. Tenik Aurélio
Prezidente Aurélio informa haree ba saudozu Francisco ne’ebe mate tanba dezastre nia husu ba veteranus no kombatente sira atu fo importansia ba saude.
“Foin fulan tolu kombatente no veteranus husi Munisípiu Lautem ne’ebe mate besik sanulu ona ne’e duni hanesan Prezidente ha’u husu ba ita hotu-hotu ba kombatentes sira hotu ba veteranus hotu-hotu bele tau importansia ba ita nia saude no ba ita nia vida”. Nia hameno
Iha fatin hanesan, reprezentante familia matebian Saudozu Francisco da Costa Miranda alias Laran Luak Mario Cabral agradese ba parte hotu ne’ebe mak kontribui no kolabora servisu hodi saudozu nia funebre la’o ho diak.
“Ami hakarak hato’o agradese ba entidade hotu-hotu ne’ebe mak desde inisiu sempre akompaña nafatin ami familia sira desde saudozu hetan dezastre to’o iis kotu iha hospital, ami nia agradese ba CCLN ne’ebe mak durante ne’e akompaña nafatin halo preparasaun ba ninia funebre ohin loron ita bele realiza serimonia funebre ne’e ho diak”. Nia agradese
Familia saudozu ne’e afirma saudozu husik hela nia faluk no oan kiak tanba ne’e nia husu atu tau matan.
“Ohin nia la iha ona, la hamutuk ona ho ita maibe nia husik hela oan nain hitu ho ninia inan sira ne’ebe mak balun agora iha universidade balun sei sekundariu hela, reprezenta familia ami husu atu nune’e estadu liu husi CCLN bele tau matan nafatin ba oan sira ne’ebe mak nia aman husik hela atu nune’e labele sai abandonadu iha tempu oin mai”. Nia husu
Saudozu Francisco da Costa Miranda alias Laran Luak hetan dezastre ho motor tanba soke karau iha Leusari-Lautem iha loron 23 Fevereiru 2024 hafoin evakua ba sentru saude Lautem tanba saudozu grave nune’e kontinua transporta ba hospital referal Baucau maibe haree saudozu todan liu tan.
Nune’e kontinua evakua ba hospital nasional Guido Valadares maibe infelismente la konsege Salva no saudozu hakotu iis iha 28 Fevereiru 2024 no hakoi iha loron 5 Marsu 2024
Saudozu moris iha Sarelari-Baricafa iha loron 30 Jullu 1964 no hahú partisipa luta libertasaun nasionál iha loron 1 Janeiru 1979 to’o 30 Agostu 1999, nune’e nia partisipasaun luta hamutuk tinan ruanulu ho fulan sanunulu, saudozu hetan ona rekuñesimentu husi estadu Timor Leste iha loron 31 Marsu 2011 ho Ordem Nicolao Lobato grau 2 iha kampu Independensia Lospalos ho dedikasaun eskluziva kategoria 8 à 14 no saudozu simu ona nia pensaun subsistensia
Jornalista: Luis Pailofo