Selebra Tinan XXII Independénsia ! Sai Deit Inspirasaun Ne’ebe Taka Frakeza Governante

SAPNewsTL, Dili : Ohin Estadu Timor-Leste selebra restaurasaun independénsia ba dala XXII, EhD Nelson Barros Pereira konsidera selebrasaun 20 Maiu sai deit inspirasaun ne’ebe taka frakeza ukun na’in sira ne’ebe la konsege hanesan mal nutrisaun, kiak, dezempregu, inflasaun, dalan aat, no dependensia ba importasaun.

 

Joven EhD  Nelson Barros Pereira Xavier fo parabéns ba Timor-Leste tanba selebra ona tinan 22 restaurasaun ukun an ho diak no susesu.

 

“Ha’u hanesan joven ida ne’ebe defisiensia hato’o ha’u nia votos parabens ba restaurasaun independénsia ba dala 22, ohin loron hakat tan pasu 1 hodi kompleta 22 anos iha ukun-rasik an, sente kontente no fo onra boot ba heroi no heroina ne’ebe mak mate ona hodi salva Timor nia liberdade no soberania”. Tenik Nelson Barros Pereira Xavier iha Manleuna-Dili, 20/05/2024.

 

Iha parte seluk, Joven defisiente ne’e sente triste tanba tinan 22 ona ukun an maibe moris kiak no mukit,  dezempregu no problema ekonomia kontinua aas iha Timor-Leste.

 

“Ha’u sente triste tebes bainhira haree serimónia ne’ebe mak organiza hosi parte relevante sira la tuir kondisaun no situasaun Timor, tanba ema barak mak halerik ba servisu, barak sei moris kiak no mukit, serimónia ne’ebe mak ohin loron halo ne’e sai kontente ba parte kiik ida maibe ema barak sei kontinua moris iha mizeria”. Nelsol preokupa

 

Nelson Barros akresenta, “Ita haree seremonia ohin loron iha munisipiu 13 no RAEOA, maibe sai deit hanesan eventu ida ne’ebe folin la’ek, hanesan joven ida sente triste tanba selebrasaun ida ne’e la reflete ba prinsipiu ukun rasik an. Ohin loron liu husi serimonia sira hanesan ne’e ukun nain sira la ko’alia kona ba oinsa liberta povu ida ne’e, liu-husi aspeitu sosial, kultural, ekonomia no politika”.

 

Nelson Barros konsidera serimonia selebrasaun  20 Maiu sai oportunidade ba osan na’in sira hodi aproveita, eventu ne’e sai inspirasaun ne’ebe taka deit frakeza ne’ebe ukun na’in sira la konsege fo susesu hanesan problema kiak, mal nutrisaun, dezempregu, inflasaun, no infraestratura barak sei hakdasak.

 

“Eventu ne’e sai oportunidade ba osan na’in sira, hodi aproveita no akumula lukru liu husi saida mak estadu ne’e gastu no halo alokasaun ba Komissaun Organizador (KO) maibe kontente minutu balun deit mais ita la haree dezenvolvimentu, so sai deit hanesan inspirasaun ida hodi taka hotu frakeza ne’ebe mak durante ukun na’in sira lidera, liliu problema mal nutrisaun, servisu infantil, kiak, sasan folin aas, dezempregu, dependénsia ba importasaun, problema infraestrutura sira ne’ebe mak estrabda barak iha rural sei aat, falta bee moos, falta eletrisidade iha area rural”. Nia kestiona

 

“Dezenvolvimentu ida ne’ebe mak la’o durante tinan 22 ona maibe povu ida ne’e maioria mak la sente, hodi goza loloos era independensia, iha area rural sira laiha bee mos, eletrisidade, estrada la diak, saúde no edukasaun dook husi hela fatin, agrikultura la la’o, no sistema adminitrasaun sira la funsiona ho diak hodi atende povu”.

 

Joven mane ho defisiensia ain ne’e mos dehan, infraestrutura fiziku barak la benefisia ba Ema ho Defisiensia (EhD) no benefisia deit ba grupu kiik ida tanba infraestrura barak la asesivel ba EhD.

 

“Dezenvolvimentu ne’ebe mak ohin loron, la refleta nesesidade povu nian, no mos la kondis ho ema ho defisiensia nia sira nia realidade, infraestrutura fiziku ohin loron laiha benefisia ba ema sira ne’ebe mak pertense ba rai ida ne’e, grupu ida ka rua mak sente no goza tanba infraestrutura barak la asesivel ba EhD”. nia informa

 

Enkuantu, joven ne’e mos husu governu atu kria kondisaun infraestrutura ne’ebe asesivel ba ema ho defisiensia, kria polítika ida ne’ebe garantia bem estar komun ba komunidade hotu, nune’e bele reduz problema sosial, injustisa, dezigualdade, importasaun aas, problema infraestrutura no dezempregu iha Timor-Leste.

 

Selebrasaun loron restaurasaun ba dala XXII ne’e, governu liu husi Ministériu Komersiu Industria (MKI) hala’o feira nasional ba produtu lokal liu husi konsertu ba munisipiu 13 inklui RAEOA. Nune’e mos Ministériu Administrasaun Estatal (MAE) aloka mos orsamentu ba munisipiu sira hodi dada bandeiraa no selebra 20 Maiu ba dala 22.

Jornalista : Ermelinda Soares