Fasilita Servisu Ho Lais, SEI Fahe Motor Ba Pontu Fokal Sira

Imajem : Entrevista SEI Elvina Sousa de Carvalho iha salaun enkontru Maria Goreti, Edifisiu SEI, Caicoli, 04/06/2024. Foto : Marciana da Conceição

SAPNewsTL, Díli – Sekretaria Estadu ba Igualdade (SEI), halo distribuisaun motorizada ba pontu fokal  hamutuk 36 husi Munisipiu 13, objetivu husi distribui motorizada ne’e atu fasilita servisu pontu fokal sira iha kada munisipiu.

Elvina Sousa haktuir SEI halo distribuisaun motorizadas ba pontu fokal sira hodi ba apoiu servisu iha kada munisipiu.

“SEI fahe motorizada ba pontu fokal sira hodi halo servisu promosaun igualdade inkluzaun, servisu akonpañamentu grupu benefisiariu sira ne’ebé simu fundus transferensia públiku husi Sekretáriu Estadu Igualdade, nomos apoiu servisu munisipal sira ne’ebé maka liga ho governu  no mos apoiu ba vítima sira violensia bazeia ba generu”. Hateten  SEI Elvina Sousa Carvalho ba Jornalista sira iha salaun enkontru Maria Goreti, Edifisiu SEI, Caicoli, 04/06/2024.

Elvina dehan importansia husi papel fokal point sira iha munisipiu no postu sira maka, distribui mos motorizada hodi fasilita sira nia servisu, maibe iha nia regra rasik atu utiliza motorizada sira hirak ne’e.

SEI nafatin kontinua halo kapasitasaun ba grupu feto maluk sira no empoderamentu ba feto sira iha politika, no ekonomia.

“Kapasitasaun nu’udar servisu prinsipal husi Sekretáriu Estadu Igualdade nian,  atu bele kombate violénsia bazeia ba géneru, violénsia doméstika ne’e ita iha ona planu asaun nasional violensia bazeia ba generu ne’ebé maka agora implementa hela, númeru violensia bazeia ba generu ne’ebé maka as sai hanesan preokupasaun públiku no ema hotu nian”.

Sekretáriu Estadu Igualdade sei nafatin servisu atu bele hasa’e konsiénsia, no fó hanoin nafatin ba feto maluk sira ne’ebé maka hetan violensia hodk hato’o keixa ba ministériu públiku.

“SEI nafatin hasa’e konsiénsia feto maluk sira ne’ebe hetan violénsia ka, esperensia violénsia atu bele brani hato’o keixa tanba, lei iha ona atu proteje maibe dala barak feto maluk balun seidauk iha korajen atu bele halo keixa ba Ministeriu públiku kona-ba violasaun ne’ebe maka sira hasoru”. Elvina Sousa informa

Pontu Fokal Postu Fatumea, Munisipiu Covalima Julio Henrique Amaral Vincente hateten, pontu fokal sira sei uza motorizada hirak ne’e tuir regra no garante sei hala’o servisu ho diak liu tan tanba iha ona transporte ne’ebe bele fasilita sira nia servisu iha baze.

“Ami sei kumpri regras estadu nian tanba sasan ne’ebé ita uza, ne’e patrimóniu estadu, ita tenke kumpri regras ne’ebé estadu fó sai ona mai ami pontu fokal sira ne’ebé ohin simu tranporte motorizada hodi fasilita ami nia servisu”.

“Motorizada ne’ebé ohin simu ne’e fasilita tebes ami, tanba ita haree distansia no kondisaun estrada iha postu sira, ha’u hanoin ho transporte ne’e bele fasilita ona ami nia servisu atu la’o di’ak liu tan iha postu administrativu, suku, aldeia mai to’o iha munisipiu”. Tenik Julio Henrique Amaral Vincente

Julio hatutan, “Dezafiu ne’ebé ami hasoru maka transporte ne’e, durante ne’e ami halerik hela ba Sekretáriu Estadu atu buka solusaun liu-liu ba transporte nian nune’e bele fasilita ami nia servisu, ohin SEI distribui ona fasilidade ne’e ba ami”. Nia hatutan.

Motorizada ne’ebé SEI atribui ba pontu fokal hamutuk tolunulu resin-neen (36),motor hurak ne’e fahe ba feto hamutuk nain-15, no mane hamutuk nain-21.

Jornalista : Marciana da Conceição