Estrada Aat Tinan 22 ! Komunidade Lore Konsidera Seida’uk Ukun An

SAPNewSTL, Lautem – Durante tinan barak nia laran, Komunidade Postu Administrativu, Lore Munisípiu Lautem, halerik ba kondisaun estrada ligasaun Lospalos Vila ba Lore tanba governu la tau atensaun.

Tuir Xefe Suku Lore 1 Abilio Amaral hateten, tinan barak ona komunidade Suku Lore 1 Postu Administrativu Lore halerik ba infraestrutura bázika liu-liu liga ba kondisaun estrada, ne’ebe aat, fó impaktu ba movimentasaun komunidade ho transporte iha tempu udan monu rai.

“Hanesan Autoridade lokál kada tinan ami sempre submete problema ne’ebe komunidade enfrenta ba servisu munisipal, liu-liu iha enkontru asembleia munisipal ninian, maibé seidauk iha resposta pozitivu, komunidade sira halerik ba estada, bainhira tempu udan estrada nakfilak ba tahu, difikulta movimentasaun trasporte publiku, privadu no ema la’o ain sira” Dehan Xefi Suku, Lore 1 Abilio Amaral, ba jornalista sira iha kna’ar fatin Lore 1, Sexta(31/06/2024)

Xefi Suku Abilio Amaral Salienta, nia parte hato’o ona problema ne’ebe komunidade Lore 1 hasoru ba parte relevante maibé, komunidade sira simu rezultadu katak, orsamentu ne’ebe Governu aloka ba Munisípiu Lautem, Governu la tau orsamentu iha infrastrutura bazika liga ba kondisaun estrada ne’ebe komunidade sira enfrenta.

“Kondisaun estrada ligasaun Lospalos Vila mai iha Lore 1 konstroi iha tempu okupasaun Indonesia, ate agora ita hetan ona independénsia tinan 22 maibé, Governu seidauk tau matan mai ami nia estrada, iha tinan 2022 kompañia ida tun ba terenu maibé mai lori tahu taka fali tahu de’it” Tenik nia.

Postu Administrativu Lore 1 nia komunidade balun lakon vida, tamba impaktu husi kondisaun estrada no sidadaun balun hetan kanek todan bainhira kondus motorizada iha tempu udan, situasaun ida ne’e hamosu dezastre hodi fo impaktu ba ema nia vida no saúde públika.

Relasiona ho kondisaun estrada, durante ne’e komúnidade nain hat (4) mak lakon vida no nain 3 mak kanek todan, tanba kauza husi estrada halo kareta monu.

“Iha tinan 2015 kompañia ida mai ateru estrada husi suku Lore 2 mai para iha aldeia Chay de’it, maibé liu tiha ida ne’e abandona tiha, no projetu ne’e la kontinua, depois mai iha 2019 sira hato’o proposta ba institutu gestaun ekipamentu (IGE), no sira konsege mai, maibé sira servisu la to’o mai iha suku Lore 1, depois fila ba, ate agora ita la hatene tuir nia parajen ne’e iha ne’ebe”. Xefe Suku ne’e dúvida

Autoridade lokal ne’e fundamenta, komunidade Lore 1 tau konfiansa ba Governu dasia bele konsidera mós Lore ninia estrada, tanba durante tinan 24 Lore oan sira mós hamrik nu’udar timor oan ida hodi luta defende patria no defende povu to’o hetan independensia.

“Durante tinan 24 Lore sai vitima ba funu, no iha era ukun an mós postu Lore sei sai nafatin vitima ba dezenvolvimentu, maibé ita nia governante sira la tau prioridade ba ida ne’e, no sira senti katak, Lore nia partisipasaun iha luta libertasaun mós parese laiha, entaun sira la tau Atensaun ba ida ne’e”. Nia husu

Enkuantu Komunidade Lore 1 Linda Ximenes hatete, kondisaun estrada ne’ebe mak a’at fó impaktu ba sira atu asesu no lori produtu ba fa’an iha Merkadu, tamba sira laiha transporte ne’ebe tula sira nia produtu husi Lore ba Merkadu Lospalos vila.

“Ami fa’an deit produtu hanesan nu, produto seluk atu lori ba merkadu ba fan ne’d laiha tamba estrada mos ladiak no ami mos tauk tanba ema barak mak hetan ona asidente kauza husi estrada ne’ebe aat, ami mos tauk atu asesu ba merkadu”.

Nia hatutan, situasaun estrada ne’ebe aat difikulta tebes sira atu hetan rendimentu hodi sustenta nesesidade familia no selu oan sira nia eskola, tamba sira iha produtu lokal barak maibé sira la konsege ba fa’an iha merkadu hodi hetan osan, Tenik Linda.

“Obrigadu tan nesesidade obriga ha’u tenki esforsu buka osan hodi responde ba nesesidade uma laran nian, tamba ha’u nia laen ho kondisaun moras ha’u labele obriga nia atu halo serbisu, ha’u mak serbisu, importante nia diak nafatin saude diak ida ne’e mak iha ha’u nia hanoin no ha’u tenki loron loron obriga an serbisu ba uma laran nian no buka osan, esforsu an para oinsa atu atende ba ami nia nesesidade iha uma loron loron nian”. Nia konta

Entertantu, Komunidade Julieta da Conceiçao akresenta, sira triste tebe-tebes tamba tinan barak ona sira halerik ba kondisaun estrada, maibé Governu seidauk toma responsabilidade hodi responde ba komunidade nia presija.

“Ami komunidade senti tristi, tamba kondisaun estrada ne’ebe aat fó impaktu ba inan isin rua sira, ami nia estrada ne’e ami sente ami seidauk ukun aan tamba ami atu ba Lospalos mos araska liu. Liliu ba inan isin rua sira bainhira senti atu tur ahi, obrigatoriamente doutor sira hatete mai ami katak atu tuir ahi ne’e tenki iha Lospalos hahoris tiha mak ami iha Lore”. Nia dehan

Antes ne’e, Prezidente Autoriedade Munisipiu Lautém mos afirma ona katak nia lideransa sei tau mos iha prioridade estrada ligasaun Postu Lospalos ba Postu Lore.

Kobertura ne’e, Jornalista SAPNewsTL hala’o liu husi Programa Media Tour ne’ebe organiza husi Assosiasaun Jornalista Timor-Leste (AJTL) kolabora ho Oxfam Timor-Leste no hetan apoia finanseiru husi Oxfam iha Hongkong.

Jornalista : Ermelinda Soares